【明報專訊】最近媽媽界熱門話題，當然係電視劇《BB來了》嘅內容同精句啦！一講起婆媳糾紛、夫妻關係，又或者新手爸媽苦惱嘅話題，為人父母都會有共鳴。劇中嘅新手爸爸黎諾懿，現實中有個一歲幾嘅囝囝，絕對有資格同大家分享經驗。佢同Mama講，當然明白做新手爸媽係幾咁辛苦，但係一切都唔緊要，因為當見到BB長大，嗰種喜悅係無嘢取代到嘅，仲叫大家一齊加油！
回想啱啱做媽媽嘅日子，Mama都覺得自己當時的確係一個神奇女俠，又要坐月，又要餵人奶，雖然有陪月有老公幫手，但好多嘢都想親力親為，半夜起身換片啦、𧨾BB瞓覺啦，都咪話唔精神緊張。最近又見到懷疑有產後抑鬱症嘅媽媽抱子墮樓新聞，真係令人好傷心。我哋一定要多啲留意同支持身邊一班默默為仔女付出嘅爸爸媽媽，有時間多啲傾偈，了解佢哋嘅需要，希望避免呢啲悲劇再次發生！
講開BB，今個星期舉行一年一度嘅BB展「第26屆國際嬰兒、兒童用品博覽」，仲八到森美將會現身，分享自己各種為人父母嘅「第一次」及培育子女心得。森美兩個仔女醒目精靈，但佢話都撞過唔少板。「我以前睇好多書去學做爸爸，但真正同仔女相處時，先發現每一個父母其實都係摸住石頭過河，一邊做，一邊改；一邊做，一邊學。做一個『好』爸爸好難，但可以做到一個盡責嘅爸爸。而且只要盡力做，就一定得嘅！」
兩位爸爸嘅鼓勵說話，大家收到晒未？
[Happy PaMa 教得樂 第201期]
