【明報專訊】呢個年頭叻仔叻女真係好多，Mama環顧身邊好多小朋友，唔單止精通兩三文語，而且周身刀張張利。除咗天分加埋父母悉心栽培，當然，小朋友為達到自己嘅目標，都付出唔少努力啦！
自製太空船過濾器模型
好似今年已經係第20屆舉辦嘅美國萬通小太空人訓練計劃，每年入選者都係從幾千個小學生中挑選，文武雙全，全部要經過一連串有關太空知識、語言表達、體能等等嘅考驗先可過關。最重要係，Mama睇到佢哋每個人仔心中都有團火。
好似入選者之一10歲嘅周正羲，參賽時就整咗一個過濾器模型，以太陽神13號協助太空人返回地球嘅過濾裝置為藍本，獲得評判大讚！原來佢仲係一個游泳健將，一星期七日每日花兩個鐘游五千米，為咗爭取佳績仲放棄學樂器嘅時間，真係少啲毅力都唔得！8歲嘅李澤茗係今次年紀最小嘅小太空人，但佢竟然話唔係想做太空人，第時想做演員。佢平日喺屋企除咗睇書，又會努力拉筋令身手更靈活，更加會自己寫劇本，同家姐、同學一齊主動表演畀老師睇！
麥明詩：設時間表好重要
今年嘅慶祝午宴之中，2003年小太空人麥明詩（Louisa）難得嚟到同大家見面。被喻為「人生勝利組」嘅佢，被一班小太空人問佢攞讀書貼士，Louisa就客氣咁話個個小太空人讀書都已經好叻，不過一個有規律嘅時間表好緊要，跟住時間表去讀書溫習、活動同休息，身體唔會出現問題，就可以用一個健康同活力嘅狀態去學習，目標就更加容易達到。
Mama覺得好有同感，好成績唔應該一味靠死讀書，作息平衡最重要。各位家長同學，你哋收唔收到呢？
[Happy PaMa 教得樂 第204期]
