有話說﹕點𧨾孩子乖乖開學?

文章日期:2018年08月28日

【明報專訊】進入開學前嘅最後倒數,各位爸媽同小豆丁準備成點呢?Mama已經開始同仔女一齊收拾心情。不過小豆丁買新書包時仲會開心幾日,但到返學前一兩日就可能「嚟料」,扭晒計、喊晒口唔肯返學。遇到咁棘手嘅情况,爸媽可能會氣上心頭,但千祈唔好威嚇小豆丁,註冊臨牀心理學家朱嘉麗過咗兩招畀我,想小朋友乖乖返學,千祈唔好「威逼利誘」!

威逼只會雙輸

「威迫」只會令佢哋更加唔鍾意返學,仲會破壞親子關係,「雙輸」㗎!「利誘」就係心理學家所講嘅外在獎勵,功效短暫,獎勵一停又會故態復萌。朱姑娘話其中物質獎勵最唔好,例如話「你乖乖返學,我買薯片、朱古力畀你食」,咁做一來下次如果無零食佢哋就唔肯返學,二來零食變成表現好嘅獎品,會令佢哋覺得零食係好嘢,建立錯誤觀念。

當然,有時爸媽真係頭都爆,用獎賞方式鼓勵小朋友都無可厚非。朱姑娘建議用親子玩樂活動作獎勵,例如帶佢去公園、陪佢捉棋,令佢哋開心之餘,亦都係健康嘅活動。但要留意,平日得閒都要喺無條件下同佢哋做呢類活動,等佢哋唔好有錯覺,以為要有好表現父母先會陪自己。

多讚賞欣賞自己

之但係,如果小朋友真係做得好好,家長係咪都唔可以獎勵佢?朱姑娘話最好、最成熟嘅做法,係鼓勵小朋友讚賞、欣賞自己,爸媽可以話:「你自己執書包,你係咪都覺得自己做得好好呢?」;「本來你唔想返學,但𠵱家肯返喎,係咪覺得自己好叻、好開心呢?」佢哋有好表現時,功勞要畀佢哋自己領,朱姑娘話畀人塞你「食死貓」當然唔開心,但家長可以畀小朋友「食好貓」,自己為自己鼓掌,唔需要靠外在因素,動機就會更強,行為都會更持續。

[Happy PaMa 教得樂 第205期]

明報影片