【明報專訊】王師奶一對小淘氣B仔和C女無驚無險讀完大學，親戚朋友見面時最經常的開場白是：「妳就好喇，仔大女大，讀完大學，又搵到嘢做，甩難啦。」回首前塵，恍如一夢，從小學、中學到大學，箇中苦况，有不足為外人道者。小婦人筆下時有過火之語，對教育烏哩單刀措施責難不留餘地，本家王先生常說：「咁勞氣，因住爆血管吖。」無他，深知社會進步，國富民強，成敗繫於教育，即使芝麻小事，亦耿耿於懷。見到有啲教育官員hea住過日子，大事唔理，小事唔郁，成日帶人遊花園，無名火就會上腦；見到有啲所謂學者，趨炎附勢，帶住成桶鞋油，專擦署長局長鞋，就會懷疑古人話「衣食足而後知榮辱」這話是吹水。在大學教書，薪金不薄，又有宿舍，何須折腰曲背，向不知何謂問責的局長叩頭？有時見到一些社會知名人士，放言「低」論，滿口胡言，真係好想幫襯鵝頸橋底打小人的三姑。記得有一個工程界人士，佢話現在年輕人滿肚牢騷，呢度唔滿意，嗰度唔順超，皆因買唔到樓，說時仲一臉輕蔑之態。嗱！呢啲就叫做名人，又叫社會賢達啦。
今時今日 仲行行出狀元？
王師奶雖然口沒遮攔，但自問心地善良，好替年輕一輩擔心，又好替家長辛苦。小婦人的嫲嫲見到王師奶為B仔C女讀書左思量、右思量，半教訓半譏諷地說：「行行出狀元，唔一定要讀大學嘅，你睇李嘉誠夠無讀大學，邊個唔知佢係香港首富。人人都知饒宗頤係大學問家，佢都無讀大學；北大教授，名重士林的季羨林，與饒宗頤一時瑜亮，人稱南饒北季，佢都無讀大學；更早的還有王雲五，是無四方帽的大學者，使乜咁緊張一定要讀大學吖！Bill Gates讀讀吓都較腳唔讀喇。」嫲嫲說的都是事實，但她的觀點停在五六十年前，今時今日，無呢支歌仔唱了。
為子女入大學如長征
王師奶認識好多有學歷，無能力的人，有時真係懷疑他們的學位係點攞番來，但唔好睇小呢頂四方帽，填寫求職申請表時發揮作用，作用就是敲門磚。如果連敲門磚都欠奉，第一輪不是給電腦踢了你出去，就是給人事部那位阿姐投入字紙籮。有無例外？有，因為你係某部門主管的舅仔或世侄女，天地線早就搭通。小婦人雖然唔認同有些家長為兒女入學的一些出位行為，例如日日寫一封信去求名校校長，天未光就站在校門口等校長座駕回來，站足一個月表示誠意，等校長的慈悲一念施捨一個學位（唔好以為小婦人吹水，真係有家長以電郵向王師奶訴苦）。入小學名校為求入好中學，入了好中學為求入大學，這過程漫長過十萬九千里長征，天下父母心大抵如是。過程中經歷好多在第三者看來荒誕不智行為，王師奶實在不忍心以「愚夫愚婦」去形容，在畸形的教育制度下，只能以其情可憫的心態去看一般家長的無可奈何！
社會是百態的，人心也是多端的，事物也隨環境遷移，嫲嫲成功不靠學位理論無錯，但今時今日，700多萬香港人中有幾多個李嘉誠？全世界70多億人，有幾多個Bill Gates？有幾多間商業機構專請無學位的人？一個學位不代表一定有能力，小婦人眼中它是一塊世俗認同的敲門磚，這也是家長們咁緊張子女讀大學的原因。
作者簡介：不是普通師奶，家中米缸有幾多斤唔知，但對香港教育界有幾多牛鬼蛇神，有幾多「嗚喱單刀」措施，卻一清二楚。「論盡教育」絕不手軟
文：王師奶 wongszelai@yahoo.com.hk
[Happy PaMa 教得樂 第205期]