有話說﹕珍惜下一代環境 體驗「無冷氣夜」

文章日期:2018年09月04日

【明報專訊】今個夏天真係好熱啊!又濕又焗,Mama兩個小豆丁一出街就大汗疊細汗,睇見都辛苦!熱嘅唔止香港,剛過去嘅8月,熱浪席捲北半球,有報道話,北極地區的氣象站記錄溫度通常低於攝氏零下20度,但上月其中一個氣象站,竟然錄得攝氏17度高溫!而格陵蘭島北部沿岸全球最古老最厚嘅海冰,專家原本認為佢喺全球暖化威脅下會最後融化,被視為「最後一片冰區」,但今年都首次出現兩次破裂,氣象專家話呢個現象「異常可怕」!

古老海冰破裂 專家稱可怕

最近多咗人關注全球暖化問題,但氣溫咁高,大家自然都開多咗冷氣。Mama八到,2017年香港人開冷氣消耗咗高達136億度電力,釋放出超過757萬公噸嘅二氧化碳。二氧化碳會引發溫室效應,加劇全球暖化,造成氣候同生態問題。Mama聽過一個地理科老師講:「我哋今日所享用嘅環境,係問下一代借番嚟嘅。」所以作為父母,我哋更要身體力行,保護環境,屬於下一代嘅美麗環境先唔會畀我哋破壞。

感受大自然 反思用電模式

環保觸覺自2010年起就舉辦「無冷氣夜」,鼓勵市民熄一晚冷氣,反思日常生活用電模式,減少濫用冷氣,明白節約能源嘅重要。習慣咗開冷氣,要霎時改變都好難,不如考慮帶小豆丁參加「無冷氣夜」前奏活動,一家大細出去戶外享受身在自然嘅感覺,慢慢改變歎冷氣嘅習慣。活動包括:「涼浸浸自然體驗夜」,透過有趣嘅感官遊戲一齊玩轉公園,認識大自然;「大帽山夜行探索之旅」,由生物科導師帶你一家上大帽山,來一場夜間探索之旅,尋找夜間出沒嘅「小精靈」,認識香港嘅野生動物!

「無冷氣夜2018」定於10月5日晚上7:00至翌日早上7:00關掉冷氣。當晚添馬公園會舉行「無冷氣夜2018啟動禮暨活力海濱夜」,一家人可以熄咗冷氣,走出戶外,喺維港景色之下,參加月下定向比賽、海濱天文活動、草地瑜伽班等等好玩活動,一邊享受涼風,一邊為地球降溫!

[Happy PaMa 教得樂 第206期]

明報影片