有話說﹕默書不夠分要留堂 道理何在?

文章日期:2018年09月11日

【明報專訊】最近家長界又有熱門話題,就係「默書低過80分應否留堂」。事緣fb群組「不願小朋友成為功課奴隸」中有網友貼文,指有學校教師宣布默書唔夠80分就要留堂,引嚟家長熱話。

Mama梗係唔同意啦。唔通留堂之後,下次默書就會變咗100分?分分鐘反而嚇親小朋友,連學都唔想番啊!

Mama搵咗香港革新教育家長同盟召集人周勁倫(Eiffel)傾吓,佢話首先無論任何形式嘅「留堂」,包括課後延伸活動,正常都會先出通告通知家長。如果教師要罰學生留堂,並唔會喺家長不知情下實行。即係話,如果小朋友放學番屋企後,先話你知頭先畀人罰留堂,咁樣並唔恰當。不單止學校要先主動同家長溝通,家長亦要了解情况,究竟小朋友留堂做啲咩。

留堂添壓力 不如用鼓勵

其次,「80分以下要留堂」呢條界線是否合理?Eiffel話:「用留堂去改善小朋友默書成績係咪適合呢?默書本身係咪一個有效嘅學習方法?香港學校普遍一星期默一次書,比測驗考試更密,如果默書少過80分要留堂,畀小朋友咁大嘅壓力,形成佢哋長期受壓,仲要承受被處罰嘅後果!我寧願你定一個高啲嘅目標,學生達成的話就給予鼓勵;而唔係達唔到就罰,咁樣只會帶嚟反效果。」

藉家教會主動反映意見

其實今時今日家長同學校有好多溝通渠道,如果家長對校政有意見,Eiffel話大家絕對「有say」。「家長首先問自己敢唔敢講出嚟?有啲家長對學校不滿,只會同仔女轉校,而唔係向學校爭取同溝通。或者佢哋覺得講咗都無用,唯有自己改變,但呢個先係最大問題。」Eiffel又提醒Mama,家教會亦可以發揮作用,幫助家長爭取同學校溝通嘅機會,而唔係做一個純粹搞聯誼活動或幫學校宣傳嘅角色。

[Happy PaMa 教得樂 第207期]

明報影片