論盡教育:不要難為楊局長

文章日期:2018年10月23日

【明報專訊】楊潤雄接受香港電台訪問,談論到用廣東話學中文,一場略帶學術性的風波再起。王師奶先行申報立場,小婦人贊成粵教中,亦贊成學普通話,兩者並行不悖。楊局長一語擊起千重浪,學者、名嘴紛紛責難,局長其後解釋意見被誤解。

師資不足成普教中障礙

普教中和粵教中成效爭拗不自今日始,有人話粵語保留中原音最多,又話粵語九聲,用詞古雅,並舉一些古代文人名句作例,如「明月幾時有」、「行行重行行」、「笑談渴飲匈奴血」證明。王師奶讀得書少,稍為深奧的討論入唔到腦。始終一句,普通話說得標準而又有教中文資歷的教師嚴重不足,這是普教中的一大障礙。既然局長後來已澄清立場,並保證學校教中文的語言有絕對自由,這事應告一段落,請不要再難為楊局長。

政策惹反感 局長成箭靶

主持人問到局長為什麼讓子女讀國際學校,局長答得好「論盡」,他說:「懶啲揀了個簡單方法。」這答案給人抓住大做文章。局長不是第一次這樣回答,他初任教育局長時已有記者問過同樣問題,當時反應不若今日強烈,只是輕輕掠過。人怕出名豬怕肥,就因為局長是本港教育舵手,教育措施如普教中、TSA、愛國教育、歷史科改用詞,惹起為數頗多家長反感,通常最普遍的反應是:「梗係喇,佢仔女讀國際學校,樣樣都唔關事,死嗰啲係我哋啲仔女啫。」

如果小婦人無記錯,早年入職嘅公務員啲仔女唔止去外國讀書有津貼,就算在本地讀國際學校都有資助;何况一般國際學校不論師生比例、校舍設備都遠勝一般津校,局長就係講唔出口。就算教育局內好多局長下屬都有子女讀國際學校,點解人人無事,唯獨局長久不久就畀人「將軍」?無他,因為他是局長囉!

張堅庭導演唔單止關心教育,仲時有玄機妙語。王師奶記得他說過教育局應裁員,今次在facebook又說公務員人工在8萬及10萬蚊以上的子女不准讀國際學校。不要以為張導演隨口噏,他意在言外。以裁員為例,他是指教育局搞啲唔等使嘅嘢太多,返璞歸真才是正道;今次以人工為規範,在範圍內的不准讀國際學校,間接是逼高官們要為改善本港教育動腦筋,如果唔改善,你的子女一齊在「醬缸」浸死。

局長應設法改善 非口不擇言

局長,你說不想深入理解香港教育制度,唔知應該點樣幫佢哋安排,你懶啲揀了個簡單方法,一讀就由幼稚園開始,讀咗咁多年就唔使去幫佢揀。局長真是老實人,這些話其他司局長如張建宗、陳茂波講得,甚至鄉愿的陳帆都講得,只有你唔講得,你唔講得就因為你是教育局長。當全香港家長為子女入學問題日夜焦慮,你點可以懶?當全港家長為入幼稚園、小學、中學、大學而叩門奔波,為副學士、自資、毅進的取捨而碰碰撞撞,你可以懶?佢哋正等緊教育一哥的指路明燈。請想一想:你的子女可以從幼稚園一路順風順水讀到大學,有公帑支付,而全港家長卻要為子女過五關斬六將,叩門叩到尊嚴盡失,撲水畀子女讀大學撲到山窮水盡,你身為局長,不能獨善己身,否則將成吳克儉2.0。楊局長,慎言吖!

楊局長整個訪問言談語氣尚算真誠,王師奶對你仍有期望,請不要令香港家長失望。

作者簡介:不是普通師奶,家中米缸有幾多斤唔知,但對香港教育界有幾多牛鬼蛇神,有幾多「嗚喱單刀」措施,卻一清二楚。「論盡教育」絕不手軟 wongszelai@yahoo.com.hk

文﹕王師奶

[Happy PaMa 教得樂 第213期]

RELATED

明報影片