【毛記台慶】講香港鬼故大玩亞視、《十年》 笑「香港人3個字,講親無好下場」 (23:54)

文章日期:2016年05月11日

毛記電視《萬千呃Like賀台慶》今晚在灣仔會展舉行,節目「抽盡」香港大小熱話,其中一個「我的恐怖志願」環節,毛記「偽員」羅若Off與早前有份演唱二創歌曲《補充練習無間做》的劉小華,以小朋友講鬼故方式大談特首行李風波、亞視之死、《十年》。

同學仔一齊講兒時志願,有人舉手話想做空姐,羅若Off即刻話「就上個月咋,聽講喺離境大堂出面,有件行李留咗喺禁區出面呀!」台上閃出恐怖燈光同音樂,好得人驚呀!

羅若Off之後又話,大個唔好做亞視,因為亞視死得好恐怖㗎。一個紅裙女人,個樣仲要唔會老㗎,佢攞住酒杯,臨死前講咗句「應該要獨立」,亞視咁就死咗啦,暗諷亞視「熄機」前最後畫面,藝人羅霖喺旅遊節目中拎住紅酒杯嘅一幕。

唔做亞視,羅若Off話只係想做平平凡凡的香港人,但另一個男同學肥Ben話,千祈唔好講呢三個字,「講親無好下場㗎!」肥Ben話有部電影用咗50萬就拍完,用咁少錢就拍完,一定唔係人拍㗎啦。呢部戲攞咗個獎,但一去到其他地方就消失咗,之後仲有隻開心鬼,係咁鬧套戲,但佢冇睇過部戲喎,一定係撞邪啦!

同學仔一片恐慌,羅若Off突然話「咩都可以驚,做香港人就唔可以驚!」台下立即傳出一陣掌聲。最後仲有改編自導演爾東陞喺金像獎頒獎禮引用美國前總統羅斯福嘅羅若Off金句:咩都需要恐懼嘅人,本身就係衰(Always afraid die, they are very kai)。

(即時港聞)

明報影片