【今日直撃】張振朗 、蔡思貝、 劉佩玥、 何廣沛今日出席商場活動，當中慘遭天降帳篷擊傷的張振朗成為全場焦點，他要撐拐杖出場，行動緩慢兼動作生硬，跟觀眾揮手打招呼時面有難色，他說：「我平安夜經歷了人生輪迴，好彩無傷到個樣，否則我要由偶像派變實力派啦，但自己又做不到﹗」張振朗赴傷上陣獻唱，又自嘲手持拐杖似「四哥」。
張振朗受訪時憶述受傷過程，他說：「我和謝東閔及朋友昨日去戶外場地吃東西，朋友突然大嗌『小心，走呀！』我未反應得切，天台好急速吹了3個帳篷過來，我被擊中腰和膝頭，瞓在地上10幾分鐘郁唔到，我好唔開心，怕影響到工作，為劇集《包青天再起風雲》操了幾個月，如果拍唔到好遺憾，件事都應該有人要負責，如果我的侄仔被打中，小朋友可大可小，事情好嚴重的。(會向有關方面追究？)遲一步再研究，目前希望先照顧好健康。」
張振朗稱他並無骨裂，醫生無交待需要幾耐復康，目前需要冰敷患處以及安排接受物理治療，今晚原本要拍打戲，亦因他不能彎腰而取消，稍後要跟監製會談拍劇的事，「套劇只是開了4日工，我好擔心會換人，現在標汗了，條腰要戴腰封，膝頭昨晚郁唔到，今朝終於郁番，但都要戴護膝，如果拍不到，操練就化為烏有。(女友陳芷尤事發時在場？)她當然有關心我，但當時不在現場。」
