【我係陳廣偉...】膺我最喜愛男歌手 陳柏宇發表開心宣言 (12:50)

文章日期:2018年01月02日

陳柏宇(Jason)在昨晚叱咤頒獎禮奪了2個獎,包括叱咤男歌手銀獎,以及首次奪得「叱咤樂壇我最喜愛的男歌手」,不少網民及歌手朋友也替他高興,Jason出席完慶功宴後,凌晨5時許網上上載叱咤獎座相片,撰長文寫下獲獎感言,並分享「開心宣言」。

「我係陳廣偉,亦係陳柏宇。喺2018年1月1號嘅呢一日,我成為咗世界上最開心嘅人。原因係我真正感受到為人哋而開心嘅樂趣,因為我真正了解到我做歌手嘅原因,係為咗可以令到更多人開心。

方法唔係唱歌俾(畀)你地(哋)聽,而係用做歌手作為一個途徑去認識更加多人,張(將)我嘅諗法向一個一個人咁宣揚開去,目的係要令到大家都可以同我一樣咁開心,一樣咁感受到唔係凡事都要為自己出發先可以得到快樂。

如果我為自己而開心,機會係,只有我自己開心。但如果我為人地(哋)而開心,咁起碼已經有兩個人開心(一個我,一個人地(哋))。條數點樣計落,都係後者着數啲。

再睇遠啲,如果每個人都係為人地(哋)而開心,就有可能全世界都開心。我知道一定會有人睇到呢到已經覺得我扮嘢,『呢個世界,邊有咁嘅人吖。』但我可以話你知,咁係因為你唔願意去相信,呢個世界會有唔自私嘅人。又或者好不幸地,你未遇上過一個咁嘅人。係有架!我唔係第一個,因為我能夠有呢個諗法,都係我身邊嘅人教我嘅。我唔係最後一個,因為我相信,每個人,終有一日,都可以做得到。我相信你地(哋)!

我係陳廣偉,亦係陳柏宇。喺2018年1月1號嘅呢一日,我成為咗世界上最開心嘅人,因為你地(哋)開心。」

(即時娛樂)