【明報專訊】組合Shine成員黃又南及徐天佑昨日獲邀到青衣擔任戲院開幕嘉賓，他們的紅館演唱會《SHINE MOMENT Live 2018》開騷日期逐漸逼近，兩人表示會在餘下不夠一個月時間瞓身狂操作最後衝刺。當中又南操肌後變大隻仔，他滿意成果，急不及待曬「麒麟臂」爆肌相騷一騷，但有網民質疑是改圖，又南知道後忍不住當眾脫下外套還自己一個公道。
記者﹕林祖傑
組合Shine成員黃又南表示，放相上網確希望大家眼前一亮，他坦言Shine成軍已15周年，自己也30多歲，如下次老一點再開演唱會，怕不夠體能操得那麼勁，故今次希望留一個美好回憶給自己。
最終目標﹕10塊腹肌
又南說﹕「我亦想講給歌迷聽，其實我斷過手，最初操時都有陰影，怕玩重磅器械時會再出事，頭3星期地獄式訓練，瞓瞓吓手抽筋扎醒，手也舉不起，真的很難受。幸好有健美先生朋友幫助、鼓勵，最終也決定和天佑一齊操，去到盡什麼也不理，希望以最好狀態，令大家眼前一亮。」他還表示已成功練得6塊腹肌，不過最終目標是如歌詞寫的練成「10塊腹肌」，希望先留一份神秘感，預告如演唱會氣氛好，覺得熱時就會除多件衫。
天佑保持神秘唔騷住
對於爆肌相片被網民質疑改圖，又南即除下外套大呼：「改圖？即刻畀你哋睇！」他亦不忘大爆天佑同樣操得一身肌肉，只是與他有別，玩另一樣嘢。天佑解釋因本身很喜歡李小龍，但要先賣關子，還笑道﹕「如果連我都騷出來，個騷就無嘢睇了！」
