鄭裕玲（Do姐）主持的商台節目《口水花多過浪花》昨日訪問劉嘉玲，解開32年前拍劇集《流氓大亨》一個遲到之謎。
Do姐指有個傳聞講了好多年：「當年拍《流氓大亨》有朝早拍法庭戲，嗰時拍劇日夜顛倒好辛苦，還有人遲到喎！我個心梗係忟啦！我頭先問嘉玲，佢話唔係佢遲到。總之我話咗一個人：『點解你遲到呀！』之後就傳話我鬧嘉玲，前幾年嘉玲接受《康熙來了》訪問仲問緊。」
嘉玲於是為自己翻案，並爆出遲到是周海媚：「嗰日妳喺同周海媚一齊拍。」Do姐有點驚訝笑說：「妳拉埋周海媚？」嘉玲繼續認真說：「係真嘅！我記得妳嗰日準時嘅！佢唔知點解遲到咗兩個鐘，妳就行埋去問：『妳點解要遲到？嗱，依家我出去飲茶喇！妳慢慢化妝等番我兩個鐘。』」
Do姐聞言笑說：「我唔記得晒！我有咁毒辣咩？」嘉玲強調自己當時在場，又直指Do姐那時好惡，不笑時令人好驚，像在化妝間化妝時，化妝師知道Do姐來即說：「起身、起身，Do姐嚟喇！」
