【明報專訊】34歲鍾嘉欣於2016年在加拿大結婚，同年誕下女兒Kelly。主力在加國照顧家庭和湊女的鍾嘉欣，間中返港拍廣告和出席品牌活動掙外快。她今年約滿無綫亦未有續約，積極展開造人大計，近日宣布再度有喜。懷第二胎的她昨日在港出席品牌活動，分享再做準媽咪的喜悅，但同時亦宣布封肚，指兩個已經夠晒數！
懷孕5個多月的鍾嘉欣身穿V領連身裙配高踭鞋出場，手腳依然纖幼、腹部只輕微隆起，身形美貌沒多變。她指佗第二胎肚子比佗Kelly時大，同樣是肚尖尖。
未知BB性別 仔女沒所謂
鍾嘉欣透露今次獨自返港並逗留兩星期，女兒和丈夫沒有同行，已應承家人完成工作後便返家好好安胎，所以趁今次產前盡量做自己喜歡的事，為免工作排得太緊密影響身體，所以謝絕所有傳媒專訪。
追問胎兒性別和預產期？鍾嘉欣大賣關子說﹕「Kelly已是上天給我們一份大禮物，有第二胎更加感恩，仔女沒所謂！我們叫醫生不用講BB性別，因為想有驚喜，已經想定男仔和女仔的名字，待產後便知道。預產期在秋天，今次之後，最快明年才會再返港見大家。」鍾嘉欣指有兩個小朋友已感滿足，宣布封肚不再生。
記掛囡囡 一講Kelly想喊
有指鍾嘉欣老公Jeremy在加國不慎露口風才泄露佗B消息，她未有嬲老公。為讓快將兩歲的Kelly實習做家姐，除教她每日隔着媽咪肚皮惜BB外，又買公仔讓她學餵奶，不過Kelly近期特別黐身，並表現開始有少少妒忌。
一提起與女兒分隔兩星期，母愛氾濫的鍾嘉欣大感不捨，已忍不住眼紅紅強忍淚水說﹕「一講Kelly我就想喊，老爺奶奶說我一出門，她就搵媽咪！唯有靠視像與女兒見面。」
佗得輕鬆開心 感激老公愛惜
鍾嘉欣表示好珍惜懷孕過程，自覺已有經驗佗得輕鬆和開心，僅少許擔心湊兩名小朋友會吃力。她指胃口有少少變﹕「以前很喜歡食意大利粉，現在幾米外嗅到意粉味都想作嘔，相信這個是素菜BB。」回想懷孕初期，她感覺特別疲倦、有作悶嘔吐，感激丈夫包容和愛惜，協助她煮飯、做家務和湊女。問到好友苟芸慧結婚會否幫手？她指對方未定確實日子，如果是今年內，她相信未必能幫手。
記者﹕林蘊兒
攝影﹕鍾偉茵
■更多娛樂猛料 ﹕ol.mingpao.com
