胡定欣與好姊妹姚子羚、曹永廉及張振朗等，現正身處新疆拍攝無綫新劇《包青天再起風雲》，近日都有在社交平台上分享拍攝環境，又要騎駱駝又要行沙漠，不過她跟姚子羚都會趁機自娛，日前就齊齊拎住大過塊面的薄餅來玩。不過今日就無得玩，要認真拍攝，更要面對沙塵，胡定欣要戴上黑紗避一避，而最大件事仲要拍喊戲，令她擔心太大風沙，眼吹到乾晒好難喊出來。
胡定欣表示：「今朝嚟到仲覺得好開心，因為人生第一次嚟到沙漠，覺得好靚，但拍咗無幾耐，就開始收太陽起風沙，我都豁出去，碌沙，瞓地，感受一下呢個環境，風沙兜口兜面吹埋嚟都唔理，點知愈來愈大風，仲要今日係拍感情戲，要喊，我仲諗，乾到咁，大風到咁，眼都擘唔開，點喊。最後…又喊得出喎…嘻嘻，點都好，今日真係有所體驗，呢刻嘅我，喺被沙包住，我要返去沖涼﹗」
