一代才女林燕妮肺癌離世，終年75歲。無綫今日凌晨重播林燕妮特備節目《懷念林燕妮 向世界出發》，讓觀眾有機會再次認識及悼念這位才女。
林燕妮在一連三集的節目內，道出自己的成長、如何面對至親離世，在韓國禪修的體驗及人生有否頓悟等，林燕妮表示：「我是林燕妮，人生是無常的，做人只可以勇敢面對…。我們是四兄弟姊妹、爸爸媽媽，有幾個傭人，我們住三層樓的獨立屋，出面有一個花園，傭人有自己地方又有車房。我們四兄弟姊妹感情好好，我同大細佬（林振強）感情最好，因為跟他很親，家中是排第一、第二，妹妹又好惜，因為得一個妹（林雁妮），細細佬（林振剛）後生時好乖，長大了才奀皮。我家人這麼短命，一個一個咁走，我是無得控制，惟有在他們病的時候盡量對他們好。
有一日（2003年）我在屋企，我記得在書房，電話響起是細佬（林振強）把聲『家姐救我一命』，我話咩事，佢話有淋巴癌，佢要捐骨髓，我話好，當時我無好大反應，佢都好平靜…驗咗我和細細佬都得，再驗就發覺細細佬都有Cancer。他要住隔離病房，我們靠Email來通訊，當時2003年剛巧沙士期間，真的麻煩，他做完電療要戴口罩，話電療後會嘔，話要戴住個口罩來嘔幾好笑呢，他仲會講笑話，又特登影張相傳給我，話你抽出來的幹細胞就係咁樣，原來橙橙地色好似紅蘿蔔咁，真係好喇，現在我的血裹有你的血了，我們傾談都好樂觀，一直咁聯繫著，直到他走為止。
細細佬見哥哥都搞成咁就走咗去，到細細佬死時我都好平靜，朝早媽咪打電話來話『小弟噚晚走咗』，當屋企兩個細佬咁頻密，走完一個都未傷心完，就到第二個時，你再震撼一次。因為當時我非常之孤單，我是單親媽媽，我個仔又唔會大過我，媽咪年紀當然大過我，我剛剛企在中間位嗰個，其實我差不多是單獨面對世界，我想禪修可以幫我面對世界及突然的變化，我們要超越死亡，要接受死亡。如果我無禪修過咁多次，我可能接受唔到，好似振強留低一些歌、留低一些『洋蔥頭』，留下好多好好笑的散文，佢已不枉此死，我想同雲上、雲上、雲上…好多層雲之上的細佬妹講『唔使掛住我，唔使擔心，你哋繼續快樂，我搞得掂，我好有勇氣』。」
林燕妮更重訪曾去禪修的華溪寺，解開個人心結，「愛的反面是恨，這句是不對，愛的反面是無愛，我這個人是無恨，但是有點耿耿於懷，也就是唔服氣…，大約坐到第4個星期左右，忽然想起嗰個人（黃霑）的名字，我笑了出來，覺得什麼都是笑話一場，有什麼大不了，自己揹負的深深不憤、傷心被人背叛的包袱，啪一聲掉下來，沒有了，所以禪修不是幫你解決問題，是幫你逐個包袱丟掉，有時我們做人太介懷，將一些唔開心的事放得好大好大，但諗來又做咩？舊朋友無咗可以識個新的，所以覺得肩膀輕了好多﹗」之後又去到她第2間禪修的無上寺，「人生的意義，其實比我們想像中簡單，只不過要自己快樂和令人快樂，要如何才能做到，就是不要那麼執著，又不要有分別心，一定要記住，人生的意義就是快樂兩個字咁簡單，但不是飲食玩樂，是你開心、我開心﹗」
相關報道：【從小認識】跟林燕妮兒子份屬好友 雷頌德：香港又少一位標誌性作家
相關報道：【告別文章】以「永恆」為題 林燕妮：每天記我念我多一些就好...
