【聽說紅館地震? 】關智斌做演唱會嘉賓 張敬軒:有啲私人恩怨要解決 (01:02)

文章日期:2018年06月18日

張敬軒演唱會第四場,邀請組合Boy'z(關智斌Kenny、張致恆Steven)擔任嘉賓。軒仔當年跟Kenny傳同性緋聞傳足10年,後來又傳感情轉淡而分開,這個晚上Kenny現身軒仔的演唱會舞台上,現場觀眾超興奮。

Boy'z出場與軒仔合唱《死性不改》引爆全場歡呼狂叫不斷,觀眾的歡呼聲大到連Kenny唱歌聲都聽不到,歌曲中段的讀白,三人又改了台詞, 先是 Steven 問: 「點解?」繼而望向Kenny:「點解你會來做嘉賓嘅?」Kenny就大聲答:「我鍾意呀,你吹呀?」又再次引爆觀眾,叫聲令整個紅館都似地震。

歌唱畢,無論 Steven或張敬軒講什麼,觀眾都一直狂叫,連軒仔都忍唔住反問觀眾:「我都唔知你哋叫乜 !」終於觀眾叫咗近兩分鐘肯靜下來,軒仔對Steven 笑說:「嘩,你講嘢佢哋都叫到咁,」轉身一指Kenny,咁佢講嘢.........」又再引來觀眾狂叫,叫聲似現場睇世界盃入球。Steven這時就插口話:「我完成任務啦,我落台先!」軒仔說:「你講嘢呀你!」最後軒仔敵不過觀眾那種瘋狂叫聲,笑住話:「知唔知咩叫無敵嘅嘉賓呀...... 」 Steven即時翻抄一句指住Kenny說 :「知唔知咩叫無敵嘅嘉賓呀?」又再一次引爆觀眾狂叫,Kenny這時大方企過軒仔側,還用手攬住好朋友,說:「咩驚你?我企到咁都仲得呀。」令觀眾拍爛手掌,歡樂氣氛去到最高點。

軒仔說Boy'z是他最初入行時相識的好朋友,所以決定第一次六場紅館個唱,一定要請埋他們來分享。台上他又搞鬼說 : 「 咁耐冇見,有啲私人恩怨想喺到解決吓,我聽講網上有人寫咗個故仔,話你哋兩個為咗我喺salon 打架,究竟係咪?」Kenny搶答:「你諗多咗啦張生!我哋兩個成日打交㗎!每次打完交,Mani就會打嚟話,打還打唔好打臉嘛!話晒靠個樣搵食。」Steven坐埋一邊,唔出聲,軒仔問佢做咩,佢就即入位:「我見你哋咁耐冇見,比你講埋先囉!」軒仔反擊:「你又知我哋好耐冇見?」又引爆觀眾狂叫,仲有觀眾大叫:「咀佢!咀佢!」

之後軒仔正經說要答謝Steven,因為他為了來做嘉賓 ,於橫店拍緊戲都趕回來。Steven就客氣回話,自己可以喺這個圈繼續生存,都係多得軒仔一路以來的幫忙。不過講完正經又開始玩嘢,反問軒仔:「我想問你,你做咩多謝我唔多謝佢?」引得觀眾又再狂叫兼大笑,軒仔話,「我點會唔多謝佢,我仲要恭喜佢,佢做咗業主嘛!」。Steven未放過Kenny,問:「你都仲未講,你點解會嚟做嘉賓?」 Kenny說 :「我來報仇呀。」Steven:「報咩仇?隔夜嗰啲呀?尋晚嗰啲仇呀?」又再次引得觀眾又再大叫大笑。終於Kenny招架不來,軒仔幫口 : 「喂,我哋下午綵排嗰陣啲稿唔係咁喎。」最後三人再合唱《La La世界》作結。

昨晚捧場圈中人還有黃秋生﹑謝霆鋒﹑謝賢﹑鄭希怡﹑何超蓮和阮兆祥等,星光熠熠。

(即時娛樂)

明報影片