【警署備案】伍淑怡被疑似警員「抄牌」感困擾:冇覺好瞓 (20:57)

文章日期:2018年6月22日

【今日直擊】模特兒伍淑怡(Yoyo)昨日在facebook公開一段電話對話錄音,聲稱在街上被截查身分證的軍裝警員,問電話號碼和地址,其後更要求做朋友。Yoyo今日先到旺角警署備案,下午再到灣仔警察總部的投訴警察課提出投訴。她在警察總部外接受《明報》訪問,詳述事發經過。

Yoyo說:「當時我行緊去地鐵站,無啦啦有個阿sir拍我膊頭,然後佢話要查我身分證,跟住問我攞個人資料,包括地址﹑電話﹑名及職業,跟住問我:『可唔可做朋友?』,我見到佢有隻結婚戒指,我就話『你已經結咗婚』,跟住佢話『呢啲嘢要秘密喇,你明我明啦』,呢句說話我覺得有暗示性嘅﹗跟住有少少窒佢,跟住我走咗,我冇諗過佢會打畀我,返到屋企後,佢真係打畀我。」

問到對話內容是什麼?她說:「撩女仔嘅嘢,因為其實當中有個訊息,係我自己寫,因為佢講『唔好意思,頭先咁唐突』,我朋友問佢:『乜嘢咁唐突』,我唔記得佢答乜嘢,我搶咗個電話就答:『你意思指你開工時間撩女仔。』(他怎樣撩你?)要Check我身分證,問完個人資料,然後再同我講『可唔可以同我做朋友?』(你當時反應是?)吓﹗朋友可以嘅,我見佢有戒指,我同佢講:『你好似結咗婚。』佢笑笑口同我講:『係呀,咁可唔可以呀?』跟住我就話:『普通朋友係可以嘅。』佢再話:『如果咁嘅情況下,就唔普通喇﹗』我就話:『我唔明你講咩?』佢再話:『呢啲嘢你明我明,都係秘密咁樣去做。』我答他一句:『我唔明你講咩,唔好意思,我走喇。』(他知否你的藝人身分?)佢唔知,之後我就同朋友講,講嗰時好似講笑咁講。

但當我返家後,我再同室友講,佢問我有冇警察編號,我話乜嘢資料都冇。我哋開頭傾完,就話咁算喇,冇佢任何資料,都做唔到任何投訴。

點知佢(指疑似警員)會打電話嚟,佢打嚟時候,第一個電話我冇聽,再打嚟我聽咗,我唔知佢係邊個,佢表露咗係今(昨)日問我攞電話嗰個人,我話我食緊飯,Whatsapp再傾。我同室友傾,佢話不如套佢(疑似警員)啲料,引佢講出我哋想要嘅嘢,作為證據,可以去報警,之後訊息就係我放上網嗰啲。

(報案情況如何?)我先去旺角差館,報案室警察就話:『其實你想嚟做啲乜嘢』我同警察講:『我係一個普通巿民,我唔熟悉法例,我又唔熟悉你哋警察守則,你問我,我應該問邊個,我依家嚟係尋求你哋協助,應該係你解答我問題,而唔係我去解答你問題。』

報案室警員再說:『如果係咁嘅話,應該要去投訴科(投訴警察課),而唔係去警署』,跟住佢(報案室警員)本身冇諗住落案,當時有記者朋友坐喺後面,佢(記者)聽到警察講乜,聽到個警察唔係幾想做,後來點解有備案編號呢?因為我要求,我將件事寫上網,啲人討論得好熱烈,我唔知個警察會唔會有啲乜嘢行為,會傷害到我或朋友,所以我想備案,咁佢先幫我備案。(為此事困擾?)噚晚冇瞓過覺,困擾都大,因為一個正常普通市民,你唔會諗被查身分證,無啦啦變咗撩女仔,跟住我覺得將件事公開講出嚟警惕,希望會有其他女仔知道,會可以安全啲,唔會好似我咁樣,但好多網民話我作故事,想博出位。

(備案後如何?)依家只係叫做備案,大約兩星期內會send信畀我。(知道邊個疑似警察?)佢未知,我只得佢(疑似警員)電話號碼,所以我會兩星期內收到封信,封信會係檔案編號,會再去落口供。」

相關新聞:遭疑似警員「抄牌」 模特兒伍淑怡嬲嬲豬:佢戴住婚戒... 

(即時娛樂)

明報影片