【今晚直撃】黃子華《金盆𠺘口》棟篤笑今晚在紅館首場開騷，全場爆滿，劉嘉玲、施南生、李嘉欣、黃秋生、吳鎮宇、蔡一傑、白雪仙、陳寶珠、關心妍與老公、古巨基與老婆，林子善夫婦、曾勵珍、蘇施黃、金燕玲及黎耀祥一家三口等，齊來朝聖。
黃子華棟篤笑大約晚上8時10分開騷，台上先播出歷年片段，而子華終於在8時25分，穿上黑西裝襯白恤衫及波鞋上台。子華上台即大搞氣氛，他說：「搞清楚今晚最重要兩句金句，就係…就係『回水無得傾、除褲太高清』。」台下觀眾即大叫回水及除褲。子華繼續說：「無錯，金盆𠺘口嗱，最後嗱，有得嗌好嗌，但嗌還嗌，唔好懶煽情，因為都係你哋搞到我無得做，大家知今時今日喺香港做藝人幾咁困難，大家對顏色喜愛唔同，無得撈啦，佢好鍾意黃色，死咗條屍唔要發黑，要發黃，黃屍華呀，佢就唔同，佢個人就好憂鬱，好Blue，但點解『襟撈』，因為有孝心，舐阿爺嘛，舐阿爺仲唔係廿四孝之作。
阿爺早晨，你邊度痕呀？今時今日係香港做藝人唯一生存機會就係色盲，都唔知黃同藍有咩分別，黑同白都唔係分得好清楚，彩虹分到，係咖啡色，彩虹即係Bear Bear熊一種，識唱歌，今時今日係識唱歌的Bear Bear熊都死，我話俾你聽。係以前你唱歌勁，就係勁，我叫張國友，我唱歌勁過張國榮加張學友，王菲見到我，都因為覺得我太勁都改名姓張，依家叫張菲，我一生人唱歌未輸過，但依家就輸畀過唔知邊度捐出嚟，都唔知咩人，爛口爛舌，今時今日咁點算，作為一個藝人，為了搵食…惟有老婆仔女唔講嘢，唔講嘢又俾人唱『搵人仔』，講到我好似拐子佬咁，將啲人仔換錢使咁樣，所以依家我喺大陸搵嘅錢喺香港使，各位我落嚟使會解釋清楚，我唔係exactly喺大陸搵嘅，我係喺過關時搵，我係一路過關一路唱，做個勇敢中港人，一地兩唱，OK啦﹗」
