【明報專訊】黃子華一連26場《金盆𠺘口》棟篤笑昨晚於紅館揭開序幕，子華宣布是他最後一次棟篤笑，一票難求，一度掀起炒風，黃牛票炒至過萬元，令子華要開腔要求有關部門關注，並放棄休息連踩26場，打擊黃牛黨。昨晚首場場外仍有數名疑似黃牛向市民兜售，但反應冷淡，開場前更割價仍無人問津。子華這晚穿上黑色西裝現身，大講政治、電影圈等話題，全場笑聲不斷，發揮「子華神」魅力。
記者﹕林祖傑
攝影﹕劉永銳
昨晚黃子華棟篤笑開騷前，見有數名疑似黃牛黨在場外兜售，有人負責視察環境，亦未有拿票出來，非常審慎。有紅館職員一度派保安驅趕，但愈接近開騷，該數名人士更明目張膽走近紅館門口，更割價由480元一張減至700元兩張，之後再減至300元一張，但還是無人幫襯。約7時大會於場外擺攤檔售賣紀念品，有杯、DVD等。
昨晚吸引大批圈中人捧場，包括劉嘉玲、施南生、李嘉欣、黃秋生、吳鎮宇、蔡一傑、白雪仙、陳寶珠、關心妍與老公、古巨基與老婆，林子善夫婦、曾勵珍、蘇施黃、金燕玲及黎耀祥一家三口等，齊來朝聖，星光熠熠，全場爆滿。
拋金句﹕回水無得傾
約晚上8時10分開騷，台上先播出黃子華歷年來的片段，子華於8時25分穿上黑西裝襯白恤衫及波鞋上台。子華上台即大搞氣氛說﹕「搞清楚今晚最重要兩句金句，就係……就係『回水無得傾、除褲太高清』。」觀眾即大叫回水及除褲。
藝人想生存就要色盲
子華繼續說，改為講政治話題﹕「無錯，金盆𠺘口喇，最後喇，有得嗌好嗌，但嗌還嗌，唔好懶煽情，因為都係你哋搞到我無得做，大家知今時今日在香港做藝人幾咁困難，大家對顏色喜愛唔同，無得撈啦，佢好鍾意黃色，死咗條屍唔要發黑，要發黃，黃屍華呀，佢就唔同，佢個人就好憂鬱，好Blue，但點解『襟撈』，因為有孝心，舐阿爺嘛，舐阿爺仲唔係廿四孝之作。阿爺早晨，你邊度痕呀？今時今日在香港做藝人唯一生存機會就係色盲，都唔知黃同藍有什麼分別，黑同白都唔係分得好清楚。」
搵人仔 做個勇敢中港人
子華又笑談搵人仔，他說：「『搵人仔』講到我好似拐子佬咁……我同人講我啲錢唔係內地搵，而係過關搵，我係一路過關一路唱，做個勇敢中港人，一地兩唱！」子華又提到97回歸、佔中、樓價升等話題，全場笑聲及掌聲不停。
