梁麗翹（Nicole）今年五月時為丈夫誕下囡囡Nanette後，沒有聘請家傭幫手，雖然辛苦也親自照顧女兒。Nanette就快三個月大，梁麗翹今日就在社交網公開沒請「姐姐」幫忙照顧小朋友的原因。她寫著︰「大家唔使再擔心我點解冇請家傭幫手喇，我哋有試過，但係現在決定暫時冇呢個需要。」
「喺知道懷孕之後不斷抉擇到底有冇需要，最後都決定試一試。履歷話：有一年半照顧BB經驗，讀過護士課程，以前在加拿大工作，操流利英語，電話面試時對答如流...履歷滿分（at least perfect for us）！」
「BB出世之前兩個月就請她早D（啲）嚟，希望佢可以早啲適應香港這新環境，亦希望能夠同佢盡快磨合，等佢融入我哋家庭。我哋都係第一次請菲傭。我哋嘅唯一要求係有乜嘢唔好擺喺心，要同我地溝通，做我哋嘅team member！當然我哋亦要身先士卒，先將佢當成我哋自己人...BB未出世，家務很少，我哋仲問佢有冇瞓晏覺習慣，教佢用屋企電視，佢做曬（晒）工作後7-8點已經入房休息...冇奢望佢煮飯似大廚，家務快捷，只希望佢有Heart！只要有heart，我哋就相信佢會願意為我哋屋企行多一步。」
「雖然之後發現貨不對辦，例如唔識煮飯，我老公教佢煮，仲煮埋比（畀）佢我地一齊食；唔識做家務，用抹廁所馬桶塊布抹枱抹鏡，之後塊布又同洗廚房碗碟嘅布一齊放入洗衣機洗；不太懂照顧BB的基本，唔識洗奶樽，唔睇洗衣液說明，三日就將可以洗100次BB衫嘅洗衣液用咗一半，如此類推...不過呢啲都唔係送走佢嘅最大原因。大家都有第一次，只要肯學，用心，乜嘢都冇問題。將佢送走，係因為我哋唔要工廠打工，clock in clock out。」
「夜半穿羊水入醫院，終於要生喇！緊張萬分，東西跌跌撞撞，她房間的燈開着了，不過完全冇出來幫忙/詢問...那一刻，真的很失望。最後，第一晚出院，BB得三日人仔，跟她同房，佢全晚唯一問過我嘅問題，係BB喊，我抱左（咗）BB出去餵奶之後問嘅：「可否閂左（咗）道門？」那一刻，---...依家Nanette就嚟三個月，自己湊B的確辛苦，私人時間係少咗（好多），例如洗碗洗碟冇得依靠別人，想落樓下食個飯，睇場戲，都要周詳計劃，犧牲了自由...」
「不過一個決定有正負兩面，其實自己好幸運，屋企個個都有彈性工作時間，可以互相配合；婆婆好掛住個孫，成日上嚟探B幫手；中（鐘）點阿姨服務多年，做事快捷妥當，願意每個月騰出多點時間過來清潔；雖然湊B困身，但現在我哋事事親力親為，換來了睇住BB成長嘅機會；兩公婆向同一個方向努力學習，感情更勝從前。」
「講咗咁耐都係想抒發下（吓）：『湊BB係辛苦，但唔痛苦；見到Nanette健康開心，值回票價。』如果遲啲要生下一胎，可能真係要再搵幫手，人夾人，祝我好運～ 💞 」
