賀入行60周年 12月紅館開騷 薛家燕:曾想再申請唔到以後唔做 (18:59)

文章日期:2018年08月13日

【今日直撃】薛家燕今日於尖沙咀舉行《薛家燕愛你無限60年演唱會》記者會,宣布12月4至5日假紅館開騷,七公主成員陳寶珠、馮素波及王愛明到場打氣,現身送上鑽石咪,蕭芳芳跟沈芝華就拍片支持,而成龍、許冠傑、譚詠麟、謝賢、胡楓及容祖兒等亦透過短片送祝福,搞到家燕姐感動得眼濕濕。家燕姐表示七公主很少機會一齊演出,現正努力度期,務求所有成員同台聚舊,又多謝圈中好友義不容辭力撐。

家燕姐受訪時表示今年適逢入行60周年,能夠同時上紅館開騷和娶新抱,可謂雙喜臨門,「有香港『演唱會之父』之稱的張耀榮,十幾年前已想捧我去紅館,但當時正忙於劇集《真情》、《皆大歡喜》拍攝,而且子女年紀尚小,生活未穩定,直到前2年再有意上紅館,入紙申請幾次都不成功,令人有點氣餒和失望,後來大女鼓勵我紀念入行60周年,再入紙申請,我都打算最後一次申請,申請不到以後不做,結果在2018年最後一個月攞到期,好開心、興奮。」現場還首播薛家燕配合個唱推出的新歌《Captain Nancy》,MV中的家燕姐性感騷胸扮復仇者救人,她笑指網民之前將其前額的大痣,惡搞成《復仇者聯盟3》中的寶石,啟發她憑歌寄意去保衛香港,MV創意總監鄭丹瑞要求她要胸襟廣闊,而排舞師Sunny Wong要將其十字步發揚光大,練到拍得住郭富城。

(即時娛樂)