梁芷珊和前夫羅傑承所生的女兒Eily,今年已經16歲,今年Eily要考GCSE/IGCSE,前天已放榜,Eily考獲佳績,獲得11A,梁芷珊昨晚在社交平台公布喜訊:「Eily 8月30日16歲生日,昨日,佢提早咗送份厚禮俾我,獎勵我16年前辛苦生佢出來(其實開刀一啲都唔辛苦,修身辛苦好多)。
佢14歲去英國讀書,今年考GCSE / IGCSE,昨天放榜,因為佢而家喺香港,所以我哋昨日上網等成績。之前佢有啲緊張,因為學校predict佢有6A*,佢擔心令人失望。
結果佢考咗11A,包括1A**, 9A*,1A (Add Maths),嗰一刻我感覺好安慰,因為最少我唔需要安慰佢。
當時我只係諗到要做一件事:打俾(畀)羅生(羅傑承)。當時佢開緊會,我留短訊:『Eily考咗11A,好開心。我要恭喜你,我哋再一次不勞而獲。』佢覆我:Good, thanks.
我以『不勞而獲』形容,係因為我哋完全無push個女,無怪獸家長過。
跟住我繼續去開會,到夜晚靜落嚟,我先至覺得呢件事其實唔簡單:我人生只係生咗一個女(應該都唔會再生啩),咁,我都算係生咗一個11A女狀元,命中率100%,好好彩。
而值得開心既(嘅)係,我終於可以用事實來證明,小朋友讀書學習係唔駛(使)迫既(嘅),開心快樂成長最緊要,絕對唔駛(使)報十間幼稚園,唔駛(使)補習,唔駛(使)學芭蕾舞,唔需要學七國語言。
今日同佢有個小小慶祝會,佢有個朋友仔,由細玩到大,Andrian剛考到IB 45分,入咗港大醫科。Andrian 媽咪係我中學同班同學,佢都係,爸爸媽媽從來無迫過佢,咪又係做狀元!
恭喜兩位小朋友,so proud of you guys, keep it up
#媽媽感到安慰 #igcse #gcse #11A #IB #45 #results #congratulations #hea媽 #不是怪獸家長」