【發火還擊】黑面工藤窒師姐黃心穎:唔使護主心切喎... (19:27)

文章日期:2018年09月02日

落選港姐工藤佑采因為決賽當晚「黑面」,而成為今屆港姐焦點,比出爐港姐三甲更具話題性,搶盡風頭,連日來工藤都受指責,港姐監製何小慧指工藤表現欠認真,而且hea跳,工藤不忿昨天在社交平台大反擊,無綫和工藤佑采各執一詞,遍地「花生」。

相關新聞:【師姐都唔撐】黃心穎斥黑面工藤唔抵爭:對佢失望 

昨晚師姐黃心穎出席劇集煞科飯局時,也不撐工藤,對她的態度感到徹底失望,她說:「還以為黑面是她跳舞態度,若是做人態度就不抵爭。」

然而心穎的回應,觸動了工藤佑采神經,工藤傍晚時分又嚟料,在instagram發火反擊心穎,字裏行間充滿火藥味,工藤指心穎護主心切,又謂「多謝」對方留意她。

工藤說:「我份人一向奉行 人不犯我~我不犯人﹑凡事留一線~他朝好相見 ﹑好多事 退一步海闊天空  所以從來都 冇公開喺網上話人﹑但係我都講過 我唔係打不還手 罵不還口! 黃心𩓙(穎) 我幾時有講過 我話比賽辛苦不滿意?從頭到尾 比賽完咗 我都冇講過﹗係直到 琴(噚)日 小氣方丈 公開抹黑我﹑我先至出聲﹑都係講緊佢哋抺黑我﹑而不是說比賽辛苦﹑既然你哋 要屈我 我都唔排除 將來 會講下比賽嘅事﹑你堂堂三甲香港小姐 連閱讀理解都唔識? 真係叻豬!😂😂😂😂😂😂 

黃小姐 你唔使咁護主心切喎!我如果係你接受訪問 就會話冇留意 冇回應啦! 因為支持吾(唔)支持 都係死路一條 ! 順得哥情失嫂意!你成功左(咗)啦、成為左(咗)第一個 我會喺網上公開講嘅人~ 方丈唔算數 因為 方丈唔係一個人 你嘅行為真系(係)表現到 你係幾甘(咁)美貌與智慧並重 😘😘😘😘、其實你係咪好耐冇見報? 所以要出嚟話一下我? 咁我好支持你繼續話~千祈唔好停~咁我哋就可以一齊見報👏🏻👏🏻👏🏻👏🏻👏🏻👏🏻 好多謝你咁留意我喎😂😂😂」

不少網民留言撐工藤,而工藤亦回應網民:「呀我受寵若驚啊、連bb都咁留意我😍😍😍😍😍」

(即時娛樂)

 

RELATED

明報影片