【明報專訊】恭喜！34歲鍾嘉欣昨日宣布兒子Jared Anthony Leung已出世喜訊，與2歲女兒Kelly湊成「好」字。鍾嘉欣稱Jared跟姐姐Kelly好似樣，如「龍鳳胎」。她今胎都是順產，但特別之處是選擇在家中生，感覺好難忘。她的生產過程好順利，但好痛。現在她要坐月照顧兒子外，亦要花多點時間在女兒身上，適應家中多了個BB。
文﹕娛樂組
鍾嘉欣與脊醫老公Jeremy結婚兩年多，育有兩歲女兒Kelly。今年3月鍾嘉欣宣布懷第2胎，及約滿無綫，專心在加拿大安胎。到7月她宣布佗男B，女兒Kelly快將有個弟弟。上月24日傳鍾嘉欣已誕下兒子，但她之後在社交平台上載大肚照，暗示B仔未出世。
B仔Jared重7磅14安士
終於昨日鍾嘉欣親自報喜，分享兒子的照片，留言宣布兒子出世，她說﹕「我們的兒子，Jared Anthony Leung，歡迎你來到我們家，我們愛你。lovelovelove－JKL→→→JJKL」她指Jared重7磅14安士，是處女座及狗年BB。照片中，Jared正熟睡中，頭髮濃密、鼻頭有肉、肥嘟嘟好可愛，還用小手托着塊面。圈中好友楊怡、陳敏之、宋熙年等都留言恭喜她。
全家講笑似生咗「龍鳳胎」
鍾嘉欣之後再透過錄音向傳媒分享喜悅，她說﹕「我好開心今日可以同大家宣布，我啱啱生咗阿仔喇，佢好健康，名字叫做Jared Anthony Leung，佢算係一個大B，出世時重7磅14安士，有好多頭髮，好似家姐Kelly，我哋全家都講笑好似生咗『龍鳳胎』，因Jared和Kelly真係好似樣。今次生B過程算很順利，都是順產，雖然好痛、好痛、好痛，但最特別今次選擇喺屋企生，因為加拿大係好支持自然分娩，我好感恩和幸運，搵到一班好好的助產士，佢哋好專業，畀咗好好嘅心靈上的支持我，好關懷備至嘅照顧，又教我一啲方法，令我生B嘅過程更加順利、更加安全，同埋聽自己的身體去生BB，我覺得呢種感覺好empowering；同老公商量完就選擇呢一個方法去生BB了，我覺得絕對係一個很難忘的經歷，同我個仔、同我個family一齊。我現在休養和坐月，要照顧好阿仔，同埋要照顧好家姐Kelly，因為呢段時間突然多咗個BB，我一定要擺番多啲時間喺Kelly身上，令佢覺得OK。」鍾嘉欣最後說好希望快點介紹個仔畀大家識，同埋好希望好快見到大家，希望大家保重，多謝所有朋友、觀眾、傳媒的支持和祝福。
香香苟芸慧讚嘉欣勇敢
鍾嘉欣的好姊妹岑麗香、苟芸慧及王君馨對於嘉欣在家中自然分娩，都讚她好勇敢、好犀利。看到BB出世好替嘉欣開心。馬浚偉在社交平台留言﹕「Yo！恭喜阿妺！Hi Jared，我係你舅父Steven啊！太開心啦！」
■更多娛樂猛料 ﹕ol.mingpao.com
