藝人林盛斌（Bob）去年與太太Pearl誕下孻仔Jaye（林道申），全家都非常開心，三位家姐霏霏、熹熹及機機亦無呷醋，仲非常疼愛呢個細佬，可謂萬千寵愛在一身。唔經唔覺，Jaye已經一歲多開始識行，向來樂於與網民分享家庭樂的Bob，當然不會錯過紀錄呢個重要時刻， 他昨日於IG上載了Jaye學行的短片，片中Jaye笑住咁行去爸爸度，身為爸爸的Bob當然冧爆，笑到見牙唔見眼，而在旁見證呢歷史一刻嘅三位家姐亦相當「交戲」，除咗不停鼓掌外，仲報以瘋狂的尖叫聲，當中二家姐更搶戲到衝入鏡，跪在墊上拍地大笑，場面搞笑。見到此情此刻，Bob都不禁留言說：「屋企D（啲）觀眾真係專業..」
而今日原來是三女機機（林機兒）的四歲生日，阿Bob當然不會大細超，他在IG上載了與機機撐枱腳的相，機機望住鏡十分可愛，阿Bob留言說：「機機，又名小周迅，今日四歲生日，同佢出去拍拖食個靚早餐慶祝吓先！佢又真係幾鬼得意同靚女嘅」
