余德丞（Dickson）跟蔡思貝因合作主持《緬甸奇幻旅程》，而成為好友，甚至爆出緋聞，早前Dickson踢波昏迷送院，蔡思貝第一時間往醫院了解情況，而她前後兩次到醫院探Dickson，足見二人交情匪淺。
今晚Dickson在社交網上載跟思貝合照，其中一張相Disckon挨落思貝膊頭，一臉冧爆，而思貝亦露出甜笑，還以為他們公告戀情，實情是Dickson叫大家投票給他們，因為他們憑該節目，有份角逐台慶頒獎禮的「最受歡迎電視拍檔」。
Dickson留言說：「人與人之間既（嘅）關係就係咁奇幻
佢鐘（鍾）意睇書 我鐘（鍾）意睇波
佢鐘（鍾）意刺激 我鐘（鍾）意舒適
佢唔鐘（鍾）意俾（畀）人控制 我鐘（鍾）意控制人
可能就係因為咁
當我亂咁噏當秘笈 佢會講埋我份台詞
當我認真同人溝通緊 佢會係汁（側）邊輕鬆慢慢等
下刪一千字
.
.
短短兩個星期，四集半小時既（嘅）節目，令我認識到呢位好朋友。希望12月16號，我地（哋）可以一齊上台攞呢個獎。
