【騷爆肌照】曾被笑「肥到冇頸」 張繼聰反而暗喜? (15:20)

文章日期:2019年01月09日

「大隻佬」張繼聰為了拍攝好電影,以及想見證自己能否進步,兩年前開始密密操肌,就算工作多忙,也堅持每星期訓練六天,風雨不改。昨晚阿聰在社交網分享過去兩年的操肌照,雖然已經成為過去,但爆肌照確實不得了。阿聰更撰長文抒發過去兩年操肌練大隻的感受:

「為咗一部好想拍嘅電影,同埋好想睇吓自己可唔可以進步,於是拜師學藝,跟師父開始依(呢)段兩年嘅旅程 每個禮拜六天訓練 就算工作幾忙,風雨不改 每次嘅訓練都係要超越自己嘅極限。不過健身依(呢)門藝術,冇short cut,只有不斷重複訓練,而且效果更一定唔會係短時間出現

師父問我,為咗増加力氣,要夠膽食,身體一定會積儲脂肪,外人一定會覺得你走樣,你得唔得?我話得,因為我就係一個唔怕走出comfort zone嘅人 結果,依(呢)兩年,最多俾(畀)人問嘅就係你係咪冇做運動?點解你咁肥?陰公(功),其實我進行訓練嘅程度係從來未試過咁甘

有幾次係片場,仲比(畀)人笑我肥到冇頸 不過,我一d(啲)都冇怯過,反而仲成日暗喜,因為練得咁辛苦,人地(哋)完全唔覺我有改變咪仲大劑?

同埋,我好相信一樣嘢,要行同人地(哋)唔同嘅路,一定會聽到好多唔同嘅聲音,唔好介意,繼續行好自己嘅路,因為從Day1開始,我就係要同人地(哋)唔同 又唔係傷害別人,點解唔盡力做 the best version of yourself?

講咗咁耐,如果你仲睇緊,咁就證明我哋有緣 如果你都係做緊自己想做嘅嘢,加油,如果有時覺得氣餒,唔緊要,深呼吸,然後再嚟過 Be the best version of yourself, you can do it,社交平台有其中一樣好處,就係永久存檔 將來,如果我嘅小朋友係追尋夢想嘅過程中感到失望,我直接將依(呢)個同上一個post 連埋大家嘅留言同佢地一齊睇一次 等佢哋知道,佢哋老竇都係顛(癲)嘅。」

另外,阿聰亦在社交網上載跟教練合照,現時的阿聰明顯更「大件」:「重咗差唔多50磅 #我都未驚過 #嚟緊減番20磅 #體重是浮雲 」

(即時娛樂)