由張衛健（Dicky）主演的《大帥哥》今晚播出大結局，劇中Dicky演技備受讚賞外，其他演出的楊秀惠﹑洪永城﹑徐榮﹑譚凱琪和蔡思貝等，演技亦令人另眼相看，幾位演員亦人氣急升，而在劇中演「艾妞」一角的楊秀惠，今日凌晨在社交網撰長文抒發感受，她感激大家接納艾妞這個角色，而且相當喜歡該角色，不過楊秀惠自爆起初接到此角色時，她直言感到擔心而且有點抗拒：
「 因為『#艾妞』喺劇集中前半段嘅角色設定，係一個風騷、貪錢、同不斷為錢而去討好男人嘅人，試問一下，有邊個會鍾意呢種人啊。人人都想自己出身高貴，唔使睇人面色做人，唔使哀求人，唔使時刻擔心會流離失所，可以永遠過住豐衣足食嘅生活啊。可惜，生活係現實嘅，為咗適應環境同生存落去，佢需要帶住虛偽嘅面具，對住人笑，只想賺多啲錢令自己有安全感，因為呢個世界冇人會保護佢為佢著想。如此真實的社會寫照。
當佢終於遇到對自己真心真意嘅人，可以唔使再虛偽，可以真實坦誠去面對呢個人嘅時候，上天卻選擇帶走咗佢。或者人生根本就係一場充滿歡樂悲傷艱難同崎嶇嘅旅程吧。佢會喊，佢會覺得傷心。但最後佢選擇帶住微笑，堅強哋去繼續所有挑戰，因為地球唔會因為悲傷而停止轉動，太陽照常會升起，日子一樣要過，雖然傷痛依舊存在。好認同佢嘅一句，喺邊度跌，就喺邊度企返（起）身。」
楊秀惠直言今次盡了百分之二百的努力，去飾演「艾妞」，她說：「因為演員永遠都係度等個機會， 等一個唔知幾時先會嚟到嘅機會， 等待一個被接納、被認同嘅機會，等一個下次唔知會否再出現的機會。 一切如過眼雲煙，喺曲終人散之後一切將恢復平靜，學習『艾妞』繼續微笑住堅強地迎接人生嘅挑戰。」
