【今晚直擊】胡楓（修哥）今晚於電視城錄影《流行經典50年》，對於好友黎小田病逝，修哥表示：「是非常非常之唔開心，話晒都係幾十年朋友，佢從童星時候已經認識，到佢做音樂人之後，亦傾得埋，時時都一齊食飯。（昔日有飾演過父子角色？）無，無扮過我兒子，我們未曾正式合作過，不過我們經常傾偈、食飯。以前粵語片年代是不同公司，所以好少合作。」
至於有什麼難忘事情？修哥說：「他這個人吊兒郎當，遊戲人間，大家都知道，我就覺得他寫曲非常非常之好聽，我都曾經叫他得閒可以寫歌，寫得咁好可以隨時公開，但他話如果有人搵他寫曲，可以好快好快交給人，唔使寫定，我就話他真係懶，他就答『懶就懶啲，不過無所謂啦』。（上次是何時見面？）我諗有幾個月時間。（當時他已好瘦？）當時冇事，冇事，大家仲有傾有講，同埋一班朋友一齊食飯。（有去過醫院探他？）無，我這兩日想去探他，有些朋友話唔好去，有消息就通知我。總括來講，這個人的人生都非常之快樂，是快樂人生。」
