關智斌（Kenny）日前接受許文軒主持的《StarTalk》訪問，談到相隔13年再推出廣東唱片，Kenny說：「其實之前已經冇再諗出唱片，覺得應該冇機會，死咗條心啦！因為自己都於心有愧，有好大段時間已經唔再係歌手身分，依家仲有機會做，放咗好多意見同想法，希望每樣嘢都有感覺，要感動自己先可以成為人哋嘅感情抒發出口。」
Kenny又說：「好似新歌《隱形人》嘅曲風，係一個新嘅嘗試，需要好多時間消化，係有史以嚟錄音錄得最長時間嘅一次，會唱得好攰，每次一唱都有好痛嘅感覺，同消耗好多能量，錄音時長期好低氣壓。」
重拾歌手身分，也要不斷增值自己，Kenny表示今年初定下多個目標，他說：「到咗3、4月，自己實行咗好多，好似唱Live方面想改進，之前發現薛凱琪把聲響咗咁多，一入咪就去到個音，我問佢做咗啲乜嘢嚟，於是佢介紹咗唱歌老師畀我，我之前有好多唱歌惡習，佢顛覆咗我唱Live時發聲方法，好似冇耳機時點去judge自己把聲。」
Kenny稱：「我又去咗學跳舞，想趁呢段時間改善自己跳舞movement，之前我啲筋好硬，我跳舞慘不忍睹，我都唔敢睇返，我仲有學結他，依家可以自彈自唱，好與唔好一件事，專唔專業又一件事，但係我做到，好開心呢一年學懂學習，搵到學習樂趣。」
