出爐影帝︱《一秒拳王》周國賢:香港人有超能力 愈踩會做得愈好 (00:39)

文章日期:2021年07月20日

周國賢憑電影《一秒拳王》獲香港電影導演會年度頒獎典禮的「最佳男主角」榮譽。他回應傳媒,感謝大會頒獎給他,說:「呢個獎對於我嚟講,係盛載咗好多重量。喺拍攝到上映期間,我自己身體健康、心靈狀態、社會氣候都發生咗好多前所未有嘅改變,呢啲改變,令到我同埋我身邊嘅人同團隊都經歷過一啲好難捱嘅時刻。對我嚟講,《一秒拳王》唔單止係一部我可以做男主角,所謂『擔正』嘅戲,而係好似一個見證人,親眼睇住嗰段時間係幾難撐、幾咁唔容易。直到上畫之後反應咁好,都好似話緊畀我知,難撐嘅,我哋都會撐得過去,再唔容易嘅困境,你只要肯行落去,都一定會搵到出路!」

他笑稱自己由一個寫歌佬都可以變大隻佬,只要肯相信與堅持,無論面對任何事,奇蹟會發生。周國賢又說:「多謝《一秒拳王》整部電影嘅團隊對我嘅照顧、包容、鼓勵,大家兄弟姊妹間嘅熱血,令我喺夾band以外都搵到一個咁多手足之情嘅地方,無論喺咩地方都好,手足係好緊要㗎!好多人可能都覺得我係一個音樂人,無啦啦走嚟演戲... ...好似差錯腳咁。但其實私底下係一個好鍾意電影嘅人,平時我就算要持續開工,我每個星期都會抽時間睇一兩套戲,而如果我得閒嗰陣,我係絕對可以煲全日劇都唔會拎起支結他彈。而促使我由喜歡睇電影,變成可以投身電影業入面嘅人,一定要多謝導演,趙善恆先生!」

「再次多謝大家喜歡《一秒拳王》,喜歡周天仁,喜歡香港電影!好多人成日話樂壇已死、香港電影已死,成長過程中那段夾band歲月令我明白『挑機』嘅重要性!愈踩,就係會做得愈好。因為我哋都有一個共同嘅超能力,香港人嘅超能力就係唔會放棄。」

大會頒「榮譽大獎」給已故的陳木勝導演,英皇電影回應:「感謝香港電影導演會頒授榮譽大獎予陳木勝導演,多年來陳導演對電影界貢獻良多,傾心、傾力、傾情,竭力為《怒火》耗盡心血,香港動作片一代巨匠,當之無愧!」

(即時娛樂)