港姐2021|為師妹佳麗頂硬上 朱晨麗不諳水性 做龍舟鼓手嚇到腳震 (16:28)

文章日期:2021年08月04日

今屆港姐破天荒搞真人騷《We Miss Hong Kong STAY-cation晉級賽》,入圍佳麗獲安排入住西貢一間酒店,在8位師姐領隊帶領下,分成紅、綠、橙及粉紅4組,參與為期11天的「Stay Battle」。

在龍舟Battle環節,除了佳麗們盡全力爭取好成績,不諳水性的師姐朱晨麗及張秀文亦硬着頭皮為組員做鼓手,朱晨麗說:「我真係腳震,因為我好怕水,但我跳開舞可能拍子好啲,所以我舉手打鼓。」張嘉兒則指龍舟Battle有助建立組員間的團結。

粉紅組佳麗感激師姐領隊劉倩婷及張秀文照顧周到:「Sandy(劉倩婷)師姐會錄低我哋嘅姿勢,指導我哋做正確動作;Sammi(張秀文)師姐會喺前線指導我哋。」張嘉兒及馮盈盈帶領的橙組則表示,很開心獲師姐送贈小禮物:「佢哋希望幫到我哋比賽,因為我哋都好怕曬,上面仲印咗我哋team名。」

經過11天相處,一班師姐師妹培養了感情,盈盈坦言佩服今屆參賽港姐:「雖然嗰時我哋選嘅時候都要外景、拍攝時間長,但今次因為係真人騷,時間再長啲,同埋連休息時都要保持警覺,同要保持狀態。」她又指與嘉兒為師妹感驕傲:「張嘉兒話班女仔好勁,如果畀着我哋當年,肯定呢樣嗰樣都做唔到。」

向海嵐與曹敏莉亦對應屆佳麗讚不絕口,向海嵐笑指自己是緊張型媽咪:「我哋同啲組員嘅Bonding好強,就算我哋唔需要喺現場,見到工作人員send組員啲相畀我哋,我哋即刻導師上身,佢坐得唔夠直呀!呢隻腳伸得唔夠長呀!」曹敏莉則指會為師妹度身訂做「參選貼士」:「我哋係希望將每一個最好嘅一面都展現出嚟!例如有啲企得唔夠直、有啲唔敢講嘢,我哋都希望有小貼士幫到佢哋。」

(即時娛樂)