【明報專訊】一年一度嘅施政報告上星期出爐，Mama最關心教育議題，第一時間揭去「教育和青少年發展」嗰部分睇。點知全長279段嘅報告當中，「教育和青少年發展」只佔14段，而小三TSA作為熱門嘅教育議題之一，報告裏隻字不提。到底特首有幾積極去減低學童壓力，改善教育問題呢？相信大家都有目共睹。
好在都有值得開心嘅措施，政府會邀請語文教育及研究常務委員會（語常會），為幼稚園老師提供中英語文專業發展課程，包括培訓佢哋去教非華語學生學中文。Mama知道樂施會一向關心少數族裔，於是搵咗佢哋嘅港澳台項目主管曾迦慧傾下，佢對呢個措拖都表示歡迎。
曾迦慧話，政府過往都有為非華語學生提供學習支援，但限於中小學，幼稚園冇份。偏偏0至8歲係學習語言嘅最佳年齡。按上學年嘅數字，本地幼稚園大約有12,000名非華語學生，將支援擴充至幼稚園都好合理。如果語常會提供相關培訓，幼師掌握技巧後，就可以喺校內提供增潤課程，為非華語學生打好中文根基。佢仲建議，可以按非華語學生比例，向幼稚園提供資源，聘請中文老師，進一步促進佢哋嘅中文學習。
協助校園共融 一舉兩得
不過Mama有啲好奇﹕幼稚園嘅中文以簡單為主，係咪一定要有增潤課程，非華語學生先跟得上呢？就咁跟大班上堂，會唔會一樣學得識？曾迦慧引述一項外國研究，原來一般幼兒入學前，已經累積咗2萬小時聽說母語嘅經驗，掌握基本語法同口語詞彙，而非華語學生喺屋企極少用廣東話溝通，「佢哋父母都唔識中文，入學前幾乎冇機會接觸中文，起步點差好遠」。
換言之，入學嘅時候，其他同學已經可以跟指令、答簡單問題，但佢哋連老師說話都未聽得明，自然跟唔上中文堂進度。學唔好中文，社交都會受影響，「一來聽唔明同學嘅說話，二來擔心詞不達意，講嘢會被取笑，久而久之就變得沉默。同學仔未必刻意避開佢哋，但見佢哋少出聲，自然唔會聚埋一齊玩」。少數族裔學童學好中文，唔單止會學業進步，對校園共融都有幫助呀。
