【今日直擊】袁詠儀（靚靚）、森美及邱達根伉儷，今日出席「荔園茶餐廳」開幕禮，靚靚與森美一齊泡製果汁特飲。靚靚指荔園帶給她無限童年回憶，希望有機會重開，香港政府幫助有情懷的商家，覺得大家不用出埠才見到動物，因為她經常帶兒子張慕童（魔童）去不同動物園，想他親身去接觸，而不是只看圖畫。
提到早前與老公張智霖一家三口去英國時黑面，皆因魔童用英文玩Live。靚靚說：「首先黑面是因為早起未食早餐，又未點餐，兩父子又商量點做Live，好多人去餐廳永遠攞個手機出來影，自己就比較抗拒，阿仔是讀國際學校，我現在乜都同佢講中文，想佢唔好唔記得中文是什麼一回事，其實佢已經有進步，點知我老公話英文由阿仔負責，真的想一嘢劈落去，我正鼓勵個仔，老公又咁樣，所以這是我兩公婆唯一矛盾。（魔童會叫你虎媽？）不會，有時問我可唔可以食咩，我突然話好，佢會話以為我唔得，其實我都要反省，原來我在他心目中乜都Say No，這是唔啱，大家都要互相學習﹗」
至於有否後悔讓魔童讀國際學校，靚靚聲稱沒有，覺得魔童好開心又好正面，唔會話「我唔得就死咗去」，小朋友要有快樂童年外，父母身教也很重要，「知識會交畀老師，家教、身教都重要，我都學習緊，唔敢講自己最好，例如我會有臭脾氣，說話快過個腦，會得罪好多人，不想個仔學我。」
