杜汶澤的網台節目「杜汶澤喱騷」，日前爆出拖糧風波，有份參演節目《為何深夜總是餓》演出的程美段，被拖糧三個月，日前網台在facebook發聲明，承認行政失當，而阿澤亦在個人fb力撐事件有失誤的幕後工作人員。昨晚阿澤在「喱騷」facebook，鄭重向程美段鞠躬道歉，而阿澤老婆田蕊妮亦在場。
阿澤說：「話你博見報，對唔住。我公司應承咗一星期畀錢，但三個月先畀，對唔住。叫人小心你、唔好用你係我唔啱，對唔住。對你所有嘅指控，對唔住。」
而程美段今日凌晨亦回應了阿澤的道歉內容：「入行年多，自己選擇嘅路上早就已經唔少瘋言冷語，走一轉討論區，有時會驚訝大家用詞狠毒到咁。但回心一諗，食得咸（鹹）魚就抵得渴，呢個圈入面，無論你係天后定係奀星，邊一個唔係咁樣成長？
所以閒言閒語，我一早習慣，亦都知道必須習慣。不過，唯獨是非黑白，我一直都堅持自己，是其是非其非，有錯要認，辯白為公。
前年睇過一張電影海報，海報上面八個字吸引咗我入場，電影大致分兩Part，一Part係打交，一Part係講堅持。男主角千方百計想女主角重新做人，最後女主角都如願成長。我份人唔喜歡打交，但我最堅持嘅事，就係堅持。
如果我因為今次而要星途沒落，其實對大眾都未必係一個大損失，不過至少我自己沒放棄過我嘅堅持，僅只如此。
呢個世界任何一個人都要食飯，同時，任何一個人都需要尊重。
啱啱收到杜汶澤先生真誠嘅道歉，我程美段公開表示接受，同時欣賞你願意喺幾千人嘅直播中和解呢件事，非常欣賞。
好多網民估我哋呢單大龍鳳，最後我同杜生可能係世紀大和解，齊齊再上LateShow Super，呢個說法實在太侮辱我哋雙方，我相信彼此當初每一隻字都係真心真意，絕無造假。所以小妹為保我同杜生嘅聲譽，只好厚住面皮單方面咁宣布唔會再同LateShow呢個平台合作，此舉絕非割席，只係唔想一個70萬人嘅平台俾我有所污衊，喺度程美段祝LateShow欣欣向榮，快啲勇闖百萬。
成件事正式完結，呢篇文章亦都係最後一次回應，就算嚟緊有幾個因為呢次事年而得到嘅甜頭專訪，我都向記者表明唔會再講一字一句，小妹喺度帶定頭盔，希望記者們多多包涵。
嚟緊程美段都會努力工作，仕途如何我都會按自己方向努力加油，人最緊要就係堅持，就好似香港人成日講嘅自強一樣，呢個世界無人幫到你，就算話有，都係呃你。」
而阿澤及後亦轉發程美段該段長文，並說：「感謝程小姐接受我的道歉！也祝你一帆風順！」
