【新手爸】伍家謙藉星座窺探仔女性格 陳偉成為兒子洗頭 (15:57)

文章日期:2020年04月11日

無綫前體育主播伍家謙昨天升呢做老竇,太太Betty為他誕下龍鳳胎。初為人父的他竟然學人研究星座,希望知道一對白羊座仔女的性格。他說︰「原來有咗小朋友之後,諗嘢方式真係會唔同咗。我竟然上網去搵白羊座咩性格🤣。」

同樣是新手爸爸的陳偉成,兒子「小陳生」於上月尾出世,至今已15日大。陳偉成在社交網上載為囝囝洗頭的片段,本身是髮型師的他幫兒子洗頭時非常熟手。陳偉成說︰「本身小陳生復活節先出世👶🏻,但今日已經十五日啦🎉,開始變化好大,最初全身無力,好似條毛毛蟲咁,我連抱都不敢🤪,現在手、腳、頸都開始有力。」

「好多人都想不到我會幫他沖涼,其實(同)好耐以前幫客人洗頭個感覺好似,沖涼就雞手鴨腳🤪,不過呢一個過程好享受,好似一份工作由低做起咁。當你做到的時候,成功感會令到你好開心,苦中一點甜😘👶🏻。」

「好多人都問我哋點解唔請工人和陪月?工人姐姐宜(依)家呢個疫情送一個俾(畀)你都唔緊要😒,陪月姐姐都唔知接觸過什麼人🤪,我都係想要長腿姐姐多啲😍。」

「好在我哋兩個媽咪都幫手。最後多得政府林鄭👍👍👍,俾(畀)我咁多假期,所有舖頭唔俾(畀)我開,咁先有咁多時間照顧小陳生👶🏻。不過我想講呢個過程,雖然🍼每三個鐘頭起一次身有啲辛苦,但係你睇住仔仔(囝囝)每日嘅變化好開心,好enjoy 👶🏻👶🏻。奶爸唔易做,媽媽更辛苦😘😘。」

(即時娛樂)