【媽媽滿意湯洛雯】已見雙方家長 馬國明:我年紀都唔細... (12:46)

文章日期:2020年06月13日

【今日直擊】馬國明和湯洛雯(靚湯)公開認愛後,全城熱話,不少網民及藝人都留言恭喜。馬明今晨如常返將軍澳電視城為《BB大晒》開工,馬明大方受訪,談到他和靚湯在ig貼同一張相,承認情侶關係,馬明說:「發展緊,發展緊啦﹗(好多人祝福你哋?)多謝大家祝福。」談到照片頗有心思,「獨角獸」蹺實「小馬」,狀甚甜蜜,馬明說:「呢個佢(靚湯)整嘅,佢好鍾意獨角獸,小馬我諗大家都明啦,但張相影咗好耐嘅,我哋之前有共識,幾時畀人影到就幾時講啦,所以我哋都好隨緣。」

期間豹哥(單立文)路過,並上前恭喜馬明拍拖:「喜事嚟嘅,恭喜你。」馬明尷尬回應:「唔好玩我啦,豹哥﹗」豹哥搞笑稱:「乜嘢玩你啫,咁係應該恭喜嘛。我睇住咁多個...依家好似拋咗錨,定下來,恭喜你。」

問到「湯馬戀」是否發展了一段時間?馬明說:「最近嘅事,我同佢拍完《心理追兇Mind Hunter》後,唔係好多聯絡,直至最近唔知點解好自然咁傾返偈,傾下傾下好似幾啱傾喎,可以發展下。」

談到他們被拍到拍拖時表現淡定及神態自若?馬明說:「我哋冇乜嘢,之前有共識,幾時畀人影到就幾時講啦﹗你話無啦啦自己講就好奇怪,好似做新聞咁,我哋都有共識。我哋都冇避忌,喺公司成日食飯,大家都開緊工,但係隔離廠,如果心水清嘅,都會奇怪點解我掉低我劇組嘅人,佢又掉低佢劇組嘅人,然後兩個人食飯,之前冇乜人問,咪繼續囉,從來都冇避忌。」

馬明續說:「依家大家覺得幾啱發展,所以有共識,如果大家唔明確時,梗係唔會有呢個共識,大家係時候隨時講得,我年紀都唔細,我從來唔會呃大家,睇下幾時到嗰個位就會講。」

問到是否已見雙方家長?馬明坦白表示:「我見過佢爹哋媽咪,佢亦見過我爸爸媽媽,食過飯。(媽咪滿意靚湯?)佢都幾鍾意佢(靚湯),我帶過佢返家食飯。」

相關新聞:【湯馬戀曝光】認愛後首現身 馬國明春風滿面笑晒口返工

相關新聞:【萬人祝福】公開認愛 馬國明湯洛雯:謝謝關心

(即時娛樂)