【專訪】兼任《熟女強人》戲劇策劃 吳家麗望替女人爭一口氣 (22:38)

文章日期:2020年09月29日

【專訪】「90年代性感女神」吳家麗是無綫藝訓班出身,1980年代尾由電視圈轉入影壇後發展順利,名利雙收,片約一部接一部,除了贏得「吳九組」美譽,1993年憑電影《郎心如鐵》封台灣金馬影后,再於2000年憑電影《流星語》奪得香港電影金像獎「最佳女配角」。近廿年無正式拍電視劇的她,今次為ViuTV劇集《熟女強人》構思故事及演出,原因是想替女人爭一口氣,「去年拍電影新版《女子監獄》,我兼任策劃構思故事,跟監製伍健雄合作愉快,之後我們再傾合作,我想起這個圈現在全部男人戲,我就想再拍女人戲,借了內地受歡迎劇集《歡樂頌》為藍本,找編輯寫一個集時尚、漂亮、有特色人物於一身的故事,然後今年6月至8月開工,好快就拍完。我對收視都幾有信心,始終女性題材劇不多,而且卡士又強,靚人靚景,希望觀眾喜歡,可以食住個勢,繼續用不同元素拍第二、三、四季,長做長有」。

吳家麗於《熟女強人》中飾演一位名模,年輕時未有把握機會生肓,到年紀成熟仍未找到對象,於是決定前往雪卵,令她感同身受,跟現實中的自己有點似,「我以前有拍拖的,不過問題太多,我又是吳九組,投入了去工作,搵到錢都不懂得花,錯失了良機。有一期試過返內地拍戲,但緣分遇不到適合對象,或者可以講我『奄尖』,如果你問我會不會雪卵?我不會了,育兒需要付出好多,自問耐性不夠,一向有養狗仔,狗仔忠心、無意見,易養過人仔,我哥哥和妹妹有小朋友,我有份湊過,就當過了癮」。

至於現年56歲的吳家麗有否想過找個伴侶脫單?她直言:「其實我有秘密情人,只是冇講出來,大家撞不到。老實講,有男性朋友,有無發展機會就隨緣,我不會花好多時間在一個人身上,我喜歡獨身生活,比較自由,但我冇拒絕,又冇積極。不過,我相信好多男人不敢放膽走近我,可能我有氣場,經常演女強人、大家姐、殺人放火、被人殺,人生經歷太勁,別人覺得我難招呼,不知道怎樣駕馭。」

欲知專訪詳情,請留意明天(9月30日)明報娛樂版。

(即時娛樂)

相關字詞﹕吳家麗 熟女強人