吳嘉熙（Cheronna）日前與爆出婚訊的余香凝（Jennifer），現身網台宣傳新歌，更大談飲醉酒經歷。余香凝自爆曾參加婚禮飲到「斷片」，結果出醜：「當時第一次去海外婚禮，其實同主人家唔係好熟嘅，但係好開心，我衝出嚟玩Game鬥飲酒，咩酒都溝晒，最後印象就係第二道菜，咁就去到第二朝早，清醒之後，我同朋友講『噚晚冇嘔都幾叻』，點知望一望張牀，全部都係嘔吐物，之後朋友問我頭有冇痛，原來我堅持飲酒，推低啲勸酒嘅朋友，自己撞埋牆，成個過程完全冇印象。」
吳嘉熙表示自己飲醉酒會嘔「黃膽水」，試過醉住陪家人掃墓，她笑指性格「好癲」，曾被舊愛逼到發惡：「我試過企上去爛咗嘅玻璃碟度，寧願鎅爛自己手腳，叫佢『可唔可以唔好再嘈啊！』我覺得自己性格個惡頂位係太直腸直肚，有時係唔畀面嘅，另一角度睇就係好誠實囉。」
