「家政高人」煮燶粒粒臘腸 謝霆鋒再出手打救張敬軒個胃 (20:48)

文章日期:2020年11月06日

張敬軒近日在社交平台狂呻新聘的外傭姐姐幾乎每早為他準備方包、白粥等非常清淡的「精美早餐」,令他冇啖好食,幾乎「繼電」﹗謝霆鋒見狀決定出手相救,請軒仔食黑胡椒味的粒粒臘腸,還拍片還教軒仔如何即整即食。

豈料,軒仔的外傭姐姐卻將粒粒臘腸煮燶,再加配一碟看起來有點瘀黑的蕃茄仔、方包及一個柑,嚇到軒仔幾乎停止心跳。軒仔將這頓早餐照片分享至社交網,並說︰「我呢一刻係平靜嘅。尋(噚)晚返到屋企十二點幾一點,家政高人問我第二朝想食咩早餐。我答食腸喇。我男神送嗰啲。我仲唔該吖(阿)高人睇下男神條片。」

「跟住我今朝就望到呢碟嘢。我問『Ahmmm...What happened to these...sausages?』佢話跟吖(阿)男神嘅方法做咗,不過佢覺得too hard too hard,所以佢又煮多陣,跟住再煎返(番)香... 佢堅係驚我冇牙。」

「望住呢碟作品,我覺得自己見暈。同各位介紹,我今朝個早餐,暗黑系個frd,瘀黑系早餐,breakfast個frd,blackfast,爆皮洋腸煎粒粒臘腸伴蕃茄仔刺身配反地心吸力茄汁。片方包係佢人生中嘅堅持。今日星期五,仲有得加個柑,上個月底我喺sogo買落嘅,完﹗鋒爺,我冇保護好你嘅腸,係我唔啱﹗」

7個小時後,霆鋒再次出手打救軒仔﹗他在社交網上載教整粒粒臘腸的片段,片段中的男聲並非霆鋒本人,而是另一把英語及另一種外語夾雜的男聲。霆鋒對軒仔說︰「🔊🔊🔊開大你個喇........叭先! 嗱...即係咁...不如咁...為咗你條腸...同你可以健健康康,我叫咗屋企偉大嘅波波,成日煮我飯果(嗰)個處男發聲,你比(畀)遮遮參透下﹗#母語教整腸 #盡人事 #得就得 #我諗遮遮唔使學閂微波爐 #我cut咗」

(即時娛樂)