香港電影業受到疫情影響，鮮有本地電影上映，臨近賀歲檔期，導演劉翁以黑色幽默鬼片打頭炮，為新春電影做宣傳。一直耐人尋味的電影海報亦曝光，導演選中戲中的兩位演員楊柳青、岑珈其的「鬼樣」現身，希望嚇到觀眾笑中有淚。
導演劉翁表示，毋懼賀歲檔上映「鬼片」，全因電影笑料十足，加上眾好友力撐，相信觀眾睇得過癮：「呢部戲可以話係笑片，我哋演員有葛民輝、鄒凱光、阿Bob（林盛斌）等，佢哋一出場都充滿喜感。其實香港以前好多呢類型電影，好似《猛鬼差館》、《猛鬼學堂》之類，好睇、好驚又好笑，只不過近年少咗好多，對上一套可能已經係《回魂夜》，其實香港人好鍾意睇呢類題材嘅電影，呢啲先係香港本土情懷。」
戲中飾演女鬼的楊柳青，劇組邀請荷李活級數的特技化妝師上妝，每次都需要數小時準備：「其實我都不停嚇到工作人員，有時在片場角落休息時，就會聽到粗口，原來佢哋突然見到我嚇咗一跳，要爆粗壓驚。」
岑珈其表示上妝後不敢照鏡，怕被造型嚇親：「好在都冇咩古靈精怪嘢發生，大家都會拜神嘅！上妝之後我會好唔方便，大家都會照顧我，餵我飲水、食嘢咁！」
