師兄妹賣口乖𢭃利市 準媽咪余香凝爆老公學打牌討好外母 (15:38)

文章日期:2021年02月15日

古天樂旗下公司藝人包括大肚人妻余香凝(Jennifer)、廖子妤(Fish)、陳穎欣(Yanny)、麥子樂、徐頴堃(Erica)、林婷,連同余潔滢(Zoe),齊齊煎糕搓湯圓開年,寓意新一年團團圓圓、步步高陞。去年升呢人妻的Jennifer,首次以「陸太」身分登場,一眾同門師兄妹賣口乖、講盡好說話向Jennifer𢭃利市!

首次派利市的Jennifer笑言派利市絕不馬虎,必定派「雙封」之餘,又會準備「好多錢」入利市,她說:「其實過往都有派利市,不過今年會派更加多!」在牛年成為人母的Jennifer表示,疫情影響下減少外出拜年,但有兩個新年習俗依舊會做,她說:「每年習俗都同阿妹(Zoe)慶祝生日,同埋返屋企打牌,因為媽媽好鍾意打牌,我哋細個時,佢已經教識我哋打牌,依家有埋老公,湊夠4個人一齊打。」

Jennifer指原本老公不懂打麻將,特別為陪余媽媽而學:「今年教識佢(老公)打牌,等佢可以邊打牌邊同媽咪傾偈,雖然以前我同媽咪、阿妹,三缺一都係咁打,但4個人打牌會開心啲。」問到老公是否「魚腩部隊」?Zoe搶答:「要喺佢老公身上食到糊,係一件好難嘅事。」Jennifer笑稱:「佢唔會贏,但佢好謹慎,又唔會輸,知道人哋要咩牌,就唔打咩!(邊個係大贏家?)通常都係媽咪贏。」

Yanny在疫情下過新年,感到有點可惜:「屋企有好多老人家,今年唔會一齊食飯,只會喺唔除口罩下拜年,以往好開心,每家人煮一味菜,可以試試對方手勢,不過今年就唔得喇。」問到在拜年期間,可會被親友催婚?Yanny表示:「唔使拜年,無時無刻都被催婚。」

麥子樂和Erica表示,新年期間跟家人共度,不過來自馬來西亞的Fish在港無親戚,新年及團年都跟家中寵物貓一起過。

(即時娛樂)