UA Cinemas（娛藝院線）今早在官方網站公布，即日起全線結業。吳思遠回應《明報》時慨嘆，疫情加上香港租金昂貴，最終令UA院線撐不住，他說：「UA院線做咗幾十年，疫情令戲院經營困難，知UA想唔做，但估唔到咁快！香港租金太貴，商場賺足每分錢，令戲院業負擔唔到。旺季時生意係特別好，但平時就普普通通，舖租咁貴，遇到今次疫情，又冇吸引人入場嘅電影，荷李活又冇大片，加上租金壓力，令UA意興闌珊，真係好可惜。UA在內地有幾間戲院，可能都會一起結業。」
吳思遠表示戲院是香港人基本娛樂場所，他說：「好似失去咗個朋友，好心噏！希望有熱心人接手做，應該會有的，同時希望商場租金唔好去到咁高，現在真係太高。戲院都係文化娛樂事業，其實政府應該輔助和有一套政策幫助戲院，我在任香港電影工作者總會會長時，向政府提出過很多意見，但都冇人聽。」
相關新聞：田啟文對UA戲院全線結業感震驚 憂影響投資者來港拍戲
