丈夫身分成謎|楊思琦被指有「虛擬老公」:我覺得好搞笑 (18:45)

文章日期:2021年03月29日

同是選美冠軍的楊思琦和羅霖,日前擔任由林盛斌和麥玲玲主持的《師父有請》嘉賓。麥玲玲相當佩服二人,她認為女人結婚後的責任已經夠多,而她們沒有另一半分擔,絕對更加辛苦,不過做得非常好。

林盛斌指她們同屬選美出身,羅霖選美後在娛樂圈工作5年就結婚,麥玲玲形容她是嫁入豪門,可惜外界不太看好,羅霖說:「坊間好多朋友真係好多打賭,睇吓結婚定分手。我都冇諗過同佢(劉坤銘)結婚,我18歲就做空姐,豪華生活同美食都少少見過世面,對佢初初冇乜感覺,因為佢唔係我鍾意嘅類型,當初佢話追我,我係好驚,因為當時八卦雜誌話佢係公子,又同其他娛樂藝人一齊,所以初初都係避開佢,不過後來一大班朋友活動,就成日見到佢。」

羅霖認為堅強湊大3個兒子,看上去很有型,但都是為世所迫,她說:「離婚唔係一朝一夕,我忍好多年,都希望啲仔大啲先,直至佢超越咗我底線其中一點,所以就離婚。(贍養費?)離婚一刻贍養費係零,我負責小朋友生活費,前夫負責小朋友教育費,點知過半年佢同我打官司,想分我一半錢,學費佢都只想畀部分,打官司真係好心力交瘁,我一個女人點算好呢?幸好媽咪話有飯食飯,有粥食粥,叫我返去。」

問到為何有勇氣一個帶3個孩子?羅霖解釋起初只是帶細仔離家,不過大仔及二仔主動帶行李去找她,變相負擔愈來愈大,她說:「離婚後我冇諗過復出,因為年紀好大,只係諗住同朋友夾份做生意,不過離婚新聞之後,有廣告同工作搵我,於是雙線發展。」

楊思琦在幕前發展得不錯,突然傳出未婚懷孕消息,她說:「生小朋友係我打算,不過之後發生嘅事,係我同對方(前男友吳帥)有問題,冇再喺埋一齊,唔係大家想像咁…件事好簡單,我唔會覺得幾震撼,當時唔敢講,面對傳媒係逃避心態,怕講多錯多。」

思琦表示對方沒有經濟上支援女兒生活費,她認為自己負擔到,就問都沒有問對方。離婚後她繼續完成跟無綫合約,不過心情上有點抑鬱,她說:「當時被追訪,啲雜誌標題字眼又好唔開心,當時都擔心前路茫茫,因為生咗小朋友角色有限制,不過演員唔需要個個都青春少艾,我唔驚人哋點睇,最緊要我有飯食。」

孩子除了學費外,還有學業上不少瑣碎事要處理,思琦表示曾試過返內地工作至凌晨返港,媽媽才告知囡囡有份功課未完成,她形容晴天霹靂,於是火速為她完成後才休息,她說:「個女見到媽咪工作辛苦,有次病咗發燒瞓喺牀,佢喺牀邊問候我,話好擔心我,仲攬一攬我,我個心已經融化咗。」

羅霖稱兒子始終沒女兒窩心,但二仔就讀心理學之後,有次回港放假對她說:「呢幾年辛苦你喇,你所做嘅嘢,我都睇到呀!」羅霖邊講邊哽咽,在旁的思琦都禁不住淚水。

對於離婚後會否期待「第二春」?楊思琦說:「頭幾年真係唔會諗,唔會有心情出去約會,不過當時個女有話想要弟弟。(女兒會否問起爸爸?)佢冇問,但佢話過想要個爸爸,所以依家好開心,亦叫現任丈夫做爸爸,不斷叫爸爸,佢恨咗好耐。」

至於現任丈夫身分一直成謎,楊思琦稱對方是圈外人,不曝光亦尊重對方決定,她說:「我入行都廿年,由細睇到我大嘅傳媒,有咩都可以講,不過佢話唔想講,我咪配合。(呢個世界上唔多人知?)係呀,網上話虛擬老公,話我一人分飾幾角,編出嚟吖嘛,咩大話冚大話,我覺得好搞笑,如果真係大話,我會好辛苦囉,我點可以諗到咁多嘢?(怪老公?)唔會怪佢,每個人想法都唔同,大家係要適應同要企喺佢角度諗,總之依家生活好開心。」

羅霖笑言離婚初期是最多人追求,可惜照顧3個小朋友太大壓力,好擔心感情生活,會令她崩潰,現時會期待找個伴,她說:「頭家好辛苦,想有個伴,啲仔將來有家庭唔會理我,我做好心理準備,對象唔使係筍盤,最緊要大家溝通到,佢心地好,唔使靚仔都可以。」

(即時娛樂)