劉俊謙日前在社交網貼了躺在病牀的照片，左手中指包了紗布，當時他未有解釋為什麼受傷。劉俊謙今日拍片講述受傷情况，他表示受傷的中指縫了3針，仍有輕微瘀傷，他憶述事發經過：「我有個好朋友揸車送我，佢開車尾箱時，我以為佢想拎嘢，我就想幫好朋友拎嘢，點知我伸隻手入去，佢就閂埋車尾箱，我隻手（指）當場夾扁，佢好驚，佢仲驚過我，佢拉返開個車尾箱後，我隻手呢個位，一夾時候擘開咗，醫生話傷口有0.5cm至1cm深，我覺得唔係好大件事，我都試過爆晒缸，但我好朋友好驚，我爆晒缸但都安撫佢，我話『冇嘢，冇嘢，我撳住傷口止血，啲肉都黏返埋』，但過咗兩小時都黏唔埋，要去醫院縫3針，咁大個仔極少入院，今次都幾深刻，當時我瞓喺度望住傷口，佢哋好似做針線咁縫傷口，當時已打麻醉針，唔算痛，呢個經驗幾得意，依家日常活動係郁到（手指），不過傷口未好晒。」
