關心妍（Jade）日前接受許文軒主持的《StarTalk》訪問，大談相隔5年再推出廣東歌《腍》的感受。Jade表示對唱歌不離不棄：「對上一次出廣東歌，已經係佗住BB嘅時候，其實音樂係我生命一部分，我唔會因為生咗個女，就完全停晒我有關音樂嘅嘢，之前自己都keep住聽新歌，鑽研歌曲同教學生，依家只係要好好咁安排時間。（再次出歌需要問准家人？） 我都有問老公，因為我要同佢配合，輪流照顧小朋友，依家我除咗要睇住我嘅時間表外，仲要睇埋我老公、我個女同教學生嘅時間表，依家真係仲忙。囡囡雖然仲未明歌手呢個職業，但佢知道表演呢件事，佢好好笑，會問我今日做完嘢係咪會有錢，咁咪可以買糖畀佢囉！」
