睇演唱會唔留力致聲沙唱唔到歌 陳凱詠要改「忘我」性格 (22:35)

文章日期:2021年05月27日

陳凱詠(Jace)日前接受許文軒主持的《StarTalk》訪問,談到推出首張實體專輯《PROCESSING》感受。Jace說:「呢張唱片記載咗我出道至今嘅過程、轉變及唔同嘅面向。」

唱片造型以綠色為主,她說:「我係一個後知後覺嘅人,原來自己鍾意綠色都唔知,公司開會時,佢哋好快就話我係屬於綠色。其實綠色真係好啱我,因為綠色對我嚟講係一個有趣嘅顏色,第一時間會諗到環保、自然,而我又鍾意真實,亦希望畀人感覺係一個有生機嘅人,熒光綠色畀人感覺好前衛,好難著上身,但我就成日著綠色上身,可能會令人抗拒同有鬼五馬六嘅感覺,所以綠色係代表我咁極端嘅面向。」

新歌《I Wish》屬輕快跳舞類型,Jace說:「我中學開始學跳舞,但係咪好鍾意,又唔算得上,甚至有段時間質疑自己,如果好鍾意跳舞,點解唔係日日練習?點解自己只係去到呢個Level?其實應該係唔夠鍾意,教小朋友跳舞係因為自己好喜歡小朋友,借佢哋過橋。除咗教佢哋數拍子、拉筋、聽音樂之外,仲會教佢哋操行、尊師重道。我入咗行之後就停咗教班,有時會喺度諗,幾時先有機會喺工作入面再接觸小朋友呢!」

Jace又表示要把「忘我」性格改善,她說:「平時講嘢太大聲,情緒太高漲,會影響唱歌,呢個真係要改。之前試過睇演唱會瘋狂大叫,我係一個睇演唱會唔留力嘅人,太興奮,最終搞到第2日出騷沙聲唱唔到。另外,我成日都唔見嘢,又唔補妝,搞到同事成日幫我執手尾,呢啲大頭蝦性格我已經改緊。」

(即時娛樂)