調教你MIRROR|花姐指Tiger「隱形」係缺點 Jeremy受Jer影響 恨單飛出歌 (00:05)

文章日期:2021年06月11日

ViuTV節目《調教你MIRROR》今晚(10日)播出第4集,今集內容圍繞「MIRROR vs SOLO」,12位成員圍在一起,練唱《給自己的信》,而導師梁祖堯在節目中問12位成員,是否渴望有「單飛」機會?

隊中年紀最輕的邱傲然(Tiger)說:「呢一刻一定係MIRROR最重要,冇MIRROR根本冇機會Solo,MIRROR係根基,當根基未打好,點發展其他嘢?如果要出獨唱,都要等多幾年先,一來我真係未準備好,更重要係我唔值得有獨唱機會。」

MIRROR經理人黃慧君(花姐)則說:「睇完佢(Tiger)《全民造星》第一回合表演拉丁舞,我已經覺得呢個男仔勁Charm(有魅力),跟佢簽約後,佢的確有好多缺點,「隱形」係一個好大缺點,我心諗點解佢成日唔出聲,永遠坐埋一邊,演出時又唔係最賣力,明明畀晒位喺中間跳舞,佢就話:『得㗎,唔需要畀我solo,畀我企側邊就得喇﹗』我覺得點呀,你可唔可以畀啲上進心?佢就同我講:『我今年先19﹑20歲,我啲哥哥(即MIRROR成員),佢哋已27至29歲,佢哋係咪需要機會多過我呢?過幾年再畀機會我都唔遲。』我話阿仔唔係咁樣㗎,如果幾年後MIRROR唔紅,你就冇機會表現自己咯喎,你冇得等㗎嘛﹗點解唔可以一齊有機會呢?我對佢係有啲生氣。(調教Tiger什麼?)我希望佢成為更進取嘅人。」

至於另一成員Jeremy(李駿傑),花姐則說:「其實我覺得佢都好適合單飛,但事實上佢真係有啲缺點,如果讓佢單飛嘅話,我哋要冒險,其實佢好有型,妖艷時好有型,但身形唔係非常好,佢唱高音唱得好好,但聲底好薄,如果獨唱成首歌都咁薄,就好刺耳,佢唱得好聽,但唔可以持久咁聽,加上機會問題,可能有啲唔好彩,暫時冇呢個單飛機會。(調教佢乜嘢?)我想令佢做積極啲,同埋調教我同佢嘅關係。」Jeremy則說:「頭兩年MIRROR中,對Solo冇乜概念,但去到今年有單飛欲望,點解有呢?我係因為見到Jer(柳應廷)喺台上(1月1日)嗰一刻,我突然都想做嗰樣嘢,或者可唔可以攞個金獎,台上表演機會,因為阿Jer而令我改變,今年繼續努力,看看下年有冇機會。」

(即時娛樂)