調教你MIRROR︱還原「梅窩事件」 證姜濤冇鬧粉絲 12子一條心 (02:35)

文章日期:2021年06月16日

ViuTV節目《調教你MIRROR》昨晚(15日)播出第7集,除了還原「梅窩事件」來龍去脈,姜濤亦是今集花姐(黃慧君)想梁祖堯調教的對象。節目開始時,姜濤坦言MIRROR內部有不少拗撬,因為12個人有12個想法,每個人有自己生活方式,出道以來大家沒好好傾過有關問題,他覺得這節目可以讓成員好好交流,令大家更團結。姜濤又承認關於自己的表演,甚至音樂上很細微的事,他覺得音樂要完全表達出自己想表達的想法,想以自己的想法為主,有些位可能自己不太啱,經理人花姐不太認同,他也很堅持去做,寧願做出來後大家覺得不好再去改,也不想未做已放棄;姜濤亦自知不擅長社交,又說自己的初心純粹是想表演給大家欣賞。

至於花姐覺得姜濤無論做什麼大家都會喜歡,所以他是最容易湊的成員;不過,他對自己很高要求,但都是關於自己的喜好,雖然他的眼光很準確,但不覺得代表姜濤啱。花姐又指姜濤入行時予人感覺很強,因他以前受過挫折,被人排斥,其他人不鍾意他是肥仔,他便努力減肥,他亦是受過挫折才有現在的姜濤。花姐覺得不可能一世都有這種運氣,所以希望姜濤學識面對自己問題、面對社會需要,然後改進自己做得更好。

之後,鏡頭轉到MIRROR跟梁祖堯討論應否勸喻在酒吧門外守候的粉絲離開,經過一輪討論,副隊長Anson Kong(江𤒹生,AK)認為他們應該直接叫粉絲離開,眾人一致通過,並覺得由隊長Lokman(楊樂文)、AK及現場擁有最多粉絲的姜濤勸喻最恰當。梁祖堯向花姐匯報有關情況,也獲得花姐批准。12位成員一起行出酒吧,然後Lokman及AK先後向粉絲作出呼籲,跟着由姜濤發言,他說:「首先同大家講聲辛苦晒,大家一直以來等咁耐,以下呢番說話,係我向支持我嘅fans講,其實一直以來,我都好少公開地向fans講一啲說話,包括關於私追嘅一啲嘢,因為我一直以來都好開心大家陪住我哋,陪住我,但今次呢個旅程,的而且確,支持我嘅歌迷,大家嘅行為令到我有少少唔開心,我唔想同大家隱瞞,因為你哋係我嘅fans,我有責任去保護你哋,我有講過,所以我唔想你哋畀我以外嘅人話,我覺得呢個係我嘅責任,唔希望支持我嘅人畀其他人話,所以,預期你哋之後畀工作人員話,不如我自己講出嚟,因為呢個係我工作一部分,我有責任拍出一個好節目畀大家睇,但我冇諗過大家嘅存在會阻礙到我工作,所以希望大家……一來辛苦到大家,一直以來嘅等候,我哋坐冷氣地方,你哋喺外面等,我哋都明白,所以希望有個雙贏局面,就係大家可以返去休息,喺呢個旅程,或之後綜藝拍攝或其他地方,大家可以給予少少空間我哋,一來大家危險,二來大家真的阻礙我哋工作。我好希望……以後大家成為令我驕傲嘅一分子,所以我唔希望再……再令大家或自己難做。不過,我真係多謝大家,所以……我唔會阻止大家繼續留喺呢度,或者點樣都好,因為我覺得係你哋嘅自由,如果大家私追時,可能跟得太貼,我唔會作出任何反應對大家,因為我覺得……一來我已經同大家講咗呢個事情,二來我畀大家反應嘅話,我會阻礙咗我嘅工作,所以喺呢度最後同大家講一次,所以希望大家快啲……離開,thank you。」Lokman接着向粉絲表示,希望大家消化他們的說話、行動,然後12子手拖手向粉絲鞠躬。而梁祖堯亦有把現場情況直播給花姐睇。

節目又有姜濤、Tiger(邱傲然)跟梁祖堯傾偈,姜濤坦言今次與私追粉絲直接對話是一件大事,「出道以嚟,私追問題,造成內部矛盾嘅其中原因之一,所以大家能夠團結面對外界嘅問題,我覺得好難忘。」Tiger直言MIRROR應該一早跟粉絲講清楚,他與姜濤也說這是一個里程碑。姜濤又指私追問題曾令大家彼此懷疑,但經過這次事件,證明12子是一條心;還爆大家曾多次經歷團結、分開,他希望MIRROR能保持團結。他知道是次旅程是希望透過梁祖堯修補成員之間的關係,他很開心今次大家可以開心見誠傾,因之前發生很多事情,連花姐也不敢讓他們坦誠地傾,因擔心講出來,MIRROR就會冇,故他很開心今次大家很團結。

(即時娛樂)