MIRROR完成Star Hall演唱會後，經理人花姐（黃慧君）在社交平台寫下她眼中的MIRROR 12子，壓軸出場的是「人氣王」姜濤。花姐表示她眼中的姜濤是個不重名利，只求將演出做到最好的外星人。為了演唱會上的單獨表演環節，姜濤竟然早在一年前就提出要開始排舞，嚇到花姐O嘴。
花姐說︰「老姜.....佢對我嚟講係一個外星人，一個係我想像以外嘅人。演唱會嘅一年前就已經同我講『喂！老花，我已經諗到演唱會個item做咩，可唔可以下星期安排排舞？』當時我真係O咗嘴︰『我連開唔開到演唱會都未知喎﹗』到演唱會期間，佢不斷問我︰『老花，我知道你依家唔會影響我哋自信，但係我想你話我知，我個item好唔好，有咩要改？』我有時會同佢講︰『放心，你嘅fans一定會鍾意。』然後佢認真咁同我講︰『我想將呢個表演做到最好。』」
「好多人同我講『你小心姜濤會囂張』，我可以肯定同大家講『老姜一定唔會』，名利對佢一啲都唔重要，因為佢個人真係好簡單，佢只係想做一個『認真嘅表演者』。」
